اسلام آباد۔31مارچ(اے پی پی):پاکستان دے مارشل آرٹس کھلاڑی عرفان محسود 8 سال توں ڳھٹ مد اچ 100 گنیز ورلڈ ریکارڈز ٻݨاوݨ آلے پہلے پاکستانی ٻݨ گئن۔ اٹلی دے مارسیلو فیری دا ریکارڈ تروڑ تے عرفان محسود گنیز ورلڈ ریکارڈز دی سنچری مکمل کیتی، اٹلی دے مارسیلو پیریں دی انگل نال 56 کلو وزن چا تے عالمی ریکارڈ ٻݨایا ہا۔ عرفان محسود پیریں دی انگل نال 63 کلو وزن چا تے عالمی ریکارڈ ٻݨائے۔ پش اپس کیٹیگری اچ عرفان محسود عالمی سطح تے سب توں ودھ 46 ریکارڈز اپݨے ناں کر چکین، انہاں 100 پاؤنڈ وزن نال 31 ریکارڈز وی ٻݨائن جیندے اچ 80 پاؤنڈ، 60 پاؤنڈ اتے 40 پاؤنڈ وزن نال ٻݨائے گئے ریکارڈز شامل ہین۔ اسٹیپ اپس، پش اپس، جمپنگ جیکس، اسٹرائیکس، ایلبو اسٹرائیکس، ہائی جمپ، سٹار جمپس اچ ورلڈ ریکارڈز ٻݨاوݨ آلے عرفان محسود آکھیے جو ہݨ تئیں 16 ملکاں دے ورلڈ ریکارڈز تروڑین جیندے اچ امریکا، برطانیہ، بھارت، چین، ناروے، جرمنی، فرانس، فن لینڈ اتے ٻئے ملک شامل ہین۔ عرفان محسود دے 16 شاگرد وی گنیز ورلڈ ریکارڈز ٻݨا چکین۔
