آپریشن بنیان مرصوص دی کامیابی، جمعہ کوں پورے ملک اچ یوم تشکر منایا ویسی، عطاء اللہ تارڑ

اسلام آباد۔15 مئی (اے پی پی)وفاقی وزیر اطلاعات و نشریات عطاء اللہ تارڑ آکھیے جو پاک فوج دی بہادری، قربانیاں اتے آپریشن “بنیان مرصوص” اچ تاریخی کامیابی تے کل (جمعہ) کوں پورے ملک اچ ’’یومِ تشکر‘‘ منایا ویسی۔ پاک فوج نال یکجہتی کیتے (کل) جمعہ کوں یوم تشکر منائے ونڄݨ بارے الیندے وفاقی وزیر اطلاعات آکھیا جو اللہ تعالیٰ معرکہ حق آپریشن “بنیان مرصوص” اچ تاریخی کامیابی ݙتی اے، اساں اپݨے شہیداں کوں یاد کریسوں، اللہ تعالیٰ دی بارگاہ اچ سجدہ شکر ادا کریسوں۔ انہاں آکھیا جو اللہ تعالیٰ پاکستان دی صورت اچ ساکوں ہکمو وݙی نعمت ݙتی اے جیندا ساݙیاں افواج بہادری اتے دلیری نال دفاع کیتے اتے اللہ تعالیٰ ساکوں فتح نصیب کیتی اے، ایں کامیابی تے پوری قوم اللہ تعالیٰ دی بارگاہ اچ سجدہ شکر ادا کریسی، اساں اپݨے شہیداں کوں یاد کریسوں۔ انہاں آکھیا جو ݙینہہ دے آغاز تے مسلح افواج اتے ملک کیتے خصوصی دعاواں کیتاں ویسن، جمعہ دے اجتماعات اچ ملک و قوم اتے افواج پاکستان کیتے خصوصی دعا کیتی ویسی، پورے ملک اچ پرچم کشائی دیاں تقریبات، شہداء دی قبراں تے حاضری ݙتی ویسی، انہاں کوں خراج عقیدت پیش کیتا ویسی۔ وفاقی وزیر اطلاعات و نشریات آکھیا جو مزار قائد اتے مزار اقبال تے گارڈز دی تبدیلی دیاں پروقار تقریبات ہوسن، شہداء دیاں یادگاراں تے دعائیہ تقریبات، پھُل رکھیے ویسن۔ انہاں آکھیا جو کل ݙینہہ دا آغاز وفاقی دارالحکومت اچ 31 تے صوبائی دارالحکومتوں اچ 21 توپاں دی سلامی نال ہوسی، اساں سب رَل تے اللہ تعالیٰ دا شکر ادا کریسوں، اللہ تعالیٰ ایں قوم دی عزت و وقار اچ ودھارا کیتا۔ وفاقی وزیر عطاء اللہ تارڑ آکھیا جو یوم تشکر دی خصوصی تقریب کل رات پاکستان مونومنٹ اسلام آباد اچ ہوسی جیندے اچ وزیراعظم محمد شہباز شریف مہمان خصوصی ہوسن، چیئرمین جوائنٹ چیفس آف سٹاف کمیٹی، سروسز چیفس اتے وفاقی وزراء تقریب اچ شریک ہوسن۔ مرکزی تقریب اچ قوم کوں یکجہتی دا سنیہا ݙتا ویسی۔ وفاقی وزیر اطلاعات آکھیا جو عوام اپݨے گھراں تے پاکستان دا جھنڈا لہراون، شام کوں چراغاں کرن اتے افواج پاکستان، شہداء دے نال یکجہتی کرن، اےہ پاکستانی قوم دی فتح اے، ایندا وی جشن مناون، پاکستان دا پرچم ہر جاء تے لڳیا نظر آسی۔ پوری قوم یوم تشکر پوری عقیدت و احترام نال منیسی۔