اسلام آباد۔30اپریل(اے پی پی) وزیراعظم محمد شہبازشریف آئی ایم ایف دی آخری مالیاتی قسط جاری تھیوݨ تے اطمینان دا اظہار کریندے ہوئیں آکھیے جو 1.1 ارب ڈالر دی آخری قسط ملݨ تے پاکستان اچ مزید معاشی استحکام آسی ۔ وزیراعظم آفس دے میڈیا ونگ توں جاری بیان موجب وزیراعظم محمد شہبازشریف آئی ایم ایف دی آخری مالیاتی قسط دے جاری تھیوݨ تے اطمینان دااظہار کیتے۔ وزیراعظم آکھیے جو آئی ایم ایف دی 1.1 ارب ڈالر دی آخری قسط ملݨ نال پاکستان اچ مزید معاشی استحکام آسی ۔ 2016 اچ میݙے قائد نوازشریف آئی ایم ایف پروگرام مکمل کیتا ہئی ، اے ایس بی اے ݙوجھا پروگرام اے جیڑھا مکمل تھیندا پئے۔ 16 مہینے دی حکومت دے دوران پاکستان کوں ڈیفالٹ توں بچاوݨ اچ آئی ایم ایف نال اے معاہدہ اہم ثابت تھئے۔ پاکستان دے معاشی تحفظ سانڳے تلخ اتے اوکھے فیصضے کیتن لیکن انہاں دے ثمرات معاشی استحکام دی صورت سامݨے آندے پئن۔ وزیراعظم آکھیے اللہ تعالی معیشت کوں بہتر بݨِاوݨ دا موقع ݙتے، پوری جان لڑیسوں ، پاکستان کوں معاشی ترقی ݙویسوں۔ قرض گھنݨ کامیابی کائنی، کامیابی اوں ݙینھ ہوسی جݙاں قرضے توں نجات پیسوں ۔ وزیراعظم آکھیے ایں جذبے نال سدھے پاسے تسلسل نال محنت جاری رہی تاں قرض توں نجات اتے معاشی خوش حالی دا دور وی وختی آسی۔وزیراعظم وزیرخزانہ محمد اورنگزیب سودھے ساری معاشی ٹیم دیاں کوششاں دی تعریف کیتی ۔ وزیراعظم آکھیے آئی ایم ایف دی منیجنگ ڈائریکٹر دا وی شکریہ ادا کرینداں جنہاں پاکستان دا اوکھے ویلھے ساتھ ݙتے۔
