پائیدار قومی ترقی کیتے دیانت داری، اخلاقیات، سانجھا اعتماد تے اجتماعی ذمہ واری تے مبنی معاشرے دی تشکیل ناگزیر اے، احسن اقبال

اسلام آباد۔16 اکتوبر (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال آکھیے جو پائیدار قومی ترقی کیتے دیانت داری، اخلاقیات، سانجھا اعتماد تے اجتماعی ذمہ واری تے مبنی معاشرے دی تشکیل ناگزیر اے، ترقی دا معیار محض معاشی اعداد و شمار، سڑکاں، ڈیماں تے عمارتاں دی تعمیر نی بلکہ قوم دے اخلاقی کردار تے معاشرتی اقدار دی مضبوطی وی اے۔اقدار تے مبنی معاشرے دے قیام، کردار سازی، سانجھے اعتماد تے اجتماعی ذمہ واری دے ودھارے دے حوالے نال منعقدہ گول میز اجلاس نال خطاب کریندے وفاقی وزیر آکھیا جو اڑان پاکستان دے ترقیاتی وژن اچ دیانت داری، اخلاقیات تے مساوات کوں بنیادی اہمیت حاصل اے، کیوں جو مضبوط اخلاقی بنیاداں دے بغیر مثبت تے پائیدار تبدیلی ممکن کائنی۔احسن اقبال آکھیا جو بنیادی ڈھانچہ ترقی دا ظاہری ڈھانچہ اے جݙاں جو اخلاقی اقدار ایں دی روح تے بنیاد ہن۔ ہسپتالاں دیاں عمارتاں تے جدید طبی آلات ایں ویلھے حقیقی معنی اچ مؤثر ثابت تھیندن جݙݨ ڈاکٹر تے نرساں احساسِ ذمہ واری تے پیشہ ورانہ اخلاقیات دے نال خدمات انجام ݙیون، ایویں تعلیمی اداریں دی کامیابی کیتے استاداں دی ذمہ واری، تربیت تے کردار سازی بنیادی اہمیت رکھیندین۔وفاقی وزیر افسوس دا اظہار کیتا جو معاشرے اچ تعلیم دا سلسلہ تاں جاری اے، لیکن تربیت تے اخلاقی کردار سازی دا پہلو کمزور پوندا ویندے۔ انہاں آکھیا جو رشوت، ملاوٹ تے حلال و حرام اچ تمیز دا فقدان معاشرتی اقدار دے زوال دیاں علامتاں ہن، اساں کوں گھراں، تعلیمی اداریں، مسیتاں تے ٻئے مذہبی مرکزاں دے ذریعے اخلاقی تربیت، اتحاد، برداشت تے عملی زندگی اچ چنڳے کردار کوں ودھارا ݙیوݨا ہوسی۔انہاں قومی وسائل دے دیانت دارانہ تے مؤثر استعمال تے زور ݙیندے آکھیا جو جے ہر بندہ قومی وسائل دی حفاظت ایویں کرے جیویں او آپݨی ذاتی دولت دی کریندے تاں پاکستان دے ترقیاتی نتیجے کئی گنا بہتر تھی سڳدن، قومی وسائل دے درست استعمال تے بدعنوانی مکاوݨ نال ملک دی ترقی دے عمل اچ نمایاں بہتری گھن آئی ونڄ سڳدی اے۔اجلاس دے دوران شرکاء کوں اقدار تے مبنی معاشرے دی تشکیل کیتے خوشحال پاکستان بارے بریفنگ ݙتی ڳئی۔ ایں مجوزہ خاکے اچ شہری ذمہ واری تے پیشہ ورانہ اخلاقیات کوں بنیادی ستون قرار ݙتا ڳئے جݙاں جو خاندانی نظام، تعلیمی اداریں، ذرائع ابلاغ تے کم دی جاہ تے اخلاقی اقدار کوں عملی زندگی دا حصہ بݨاوݨ تے زور ݙتا ڳیا۔ ایں ضمن اچ آئینِ پاکستان، قومی نصاب تے پیغامِ پاکستان سودھے موجودہ قومی اقدامات توں وی استفادہ کرݨ دی تجویز پیش کیتی ڳئی۔احسن اقبال آکھیا جو اخلاقی اقدار دے ودھارے کیتے محض عارضی مہمات کافی کائنی بلکہ ہک منظم تے مستقل حکمتِ عملی اپناوݨی ہوسی۔ انہاں صوبائی حکومتاں، تعلیمی اداریں، خانداناں تے مذہبی مراکز دی سانجھ نال ملک اچ کردار سازی تے اخلاقی تربیت دے اقدامات اڳوں ودھاوݨ تے زور ݙتا تے اعلان کیتا جو ایں مقصد کیتے ہک مستقل ورکنگ گروپ بݨایا ویسے جیڑھا جو اخلاقیات، کردار سازی تے شہری ذمہ واری دے ودھارے کیتے جامع حکمتِ عملی بݨیسی۔