وزیراعظم شہباز شریف  دا دورہ سعودی عرب کامیاب رہیا،  ورلڈ اکنامک فورم اچ غزہ  بارے انھاں دے موقف کوں پذیرائی ملی، ڈیجیٹل حقوق دا تحفظ ضروری اے، دیہی  معیشت اچ کساناں دا وݙا حصہ اے، انھاں دی حق تلفی نی ہووݨی چاہیدی ، عطاءاللہ تارڑ

اسلام آباد۔2مئی  (اے پی پی):وفاقی وزیر اطلاعات و نشریات عطاءاللہ تارڑ آکھیے جو وزیراعظم شہباز شریف  دا دورہ سعودی عرب کامیاب رہیا پچھلے کئی ݙھاکیں اچ سعودی عرب دا اتنا کامیاب دورہ نی ݙٹھا ڳیا ۔ سعودی ولی عہد دی ہدایت تے سعودی وزرا فورم تے غزہ دے حوالے نال وزیراعظم دے موقف کوں بھرپور پذیرائی ملی، سوشل میڈیا تے پروپیگنڈے اتے افواہیں دا تدارک کرݨا ہوی ، ڈیجیٹل حقوق دا تحفظ ضروری اے۔ وفاقی وزیر قانون اعظم نذیر تارڑ دے رلے پریس کانفرنس توں خطاب کریندے ہوئیں وفاقی وزیر اطلاعات آکھیے وزیراعظم شہباز شریف دا اڄوکا دورہ سعودی عرب انتہائی کامیاب رہیا، سعودی وزرا اتے اہم شخصیات نال ملاقاتاں دا سلسلہ ݙو ݙینھ تئیں جاری رہیا 12 اعلیٰ سطحی اجلاس تھئن ، ساری شخصیات پاکستان نال رل تے کم کرݨ تے عزم دا اظہار کیتے۔ وفاقی وزیر آکھیے ھک مہینے اچ وزیراعظم شہباز شریف دی سعودی ولی عہد نال ݙو واری ملاقات تھئی ، وزیراعظم دے پچھلے دورہ دے بعد مشترکہ اعلامیہ وی جاری تھئے ، عید دے وختی بعد سعودی وزیر خزانہ متعلقہ وزرا دے نال پاکستان آئے اتے پاکستان اچ سعودی سرمایہ کاری دے حوالے نال خاصی پیشرفت اتے ڳالھ مہاڑ تھئی ۔ وزیراعظم دے اڄوکے دورہ سعودی عرب دے بعد اڳلے کجھ ݙینھ اچ سعودی عرب دی کاروباری شخصیات دا ھک وݙا وفد پاکستان آندا پئے ۔ انہاں آکھیے سعودی ولی عہد دی ہدایت تے سعودی وزرا پاکستان دے اندر توانائی، زراعت، انفارمیشن ٹیکنالوجی، معدنیات سودھے مختلف شعبہ جات دے اندر جامع پروگرام مرتب کیتے، اے پاک سعودی تعلقات اچ ھک نواں آغاز اے ھک مہینے دے گھٹ عرسے اچ سعودی اعلیٰ سطحی وفد دا پاکستان آؤݨ مثبت قدم اے، سعودی کاروباری شخصیات دے وفد دے حوالے نال وزیراعظم دی ہدایت تے بھرپور تیاری کیتی ایندی پئی اے  وفد دے پاکستان اچ قیام دے دوران مزید پیشرفت تھیسی ۔