پاکستان دا آئین آزادی صحافت دی ضمانت ݙیندے ،میڈیا دی ذمہ واری اے جو صحافتی اخلاقیات دی پابندی کرے،  صدرآصف علی زرداری داآزادی صحافت دے جڳ ݙیھاڑ تے پیغام

اسلام آباد۔3مئی  (اے پی پی):صدر مملکت آصف علی زرداری آکھیے پاکستان دا آئین آزادی صحافت دی ضمانت ݙیندے ،میڈیا دی ذمہ واری اے جو صحافتی اخلاقیات دی پابندی کرے، قومی مفاد سامݨے رکھیندے ہوئیں ذمہ دارانہ تے درست رپورٹنگ کرے،میڈیا کوں نقلی خبراں دے سدباب اتے اخلاقی اقدار دے ودھارے سانڳے آپݨا کردار ادا کرݨا چاہیدے۔  آزادی صحافت دے جڳ ݙیھاڑ ، 3 مئی 2024، دے موقع تے آپݨے پیغام اچ صدر مملکت آصف علی زرداری آکھیے اڄ میڈیا کوں اساں آئین دے مطابق آزاد، خود مختار اتے  متنوع بݨاوݨ سانڳے ماحول تشکیل ݙیوݨ دے عزم نال آزادی صحافت دا ݙینھ منیندے پیوں،  آزادی صحافت دا عالمی ݙینھ اساکوں آپݨے ملک اچ آزادی صحافت دی صورتحال تے غور کرݨ دا موقع ݙیندے ۔ اے ݙینھ صحافیاں سانڳے ھک محفوظ اتے سازگار ماحول پیدا کرݨ دی کوششاں دی یاد ݙویندے ۔ انہاں آکھیے جو ھک آزاد پریس عالمی اہمیت دے مسئلے اجاگر کرݨ ، نقلی خبراں تے توہمات دور کرݨ، معاشرے دی طرفوں نگرانی کرݨ سانڳے ناگزیر اے ۔ صدر مملکت آکھیے موسمیاتی تبدیلی، گرین ٹیکنالوجیز، آلودگی اتے گلوبل وارمنگ سودھے عالمی مسائل بارے آگاہی پیدا کرݨ اچ میڈیا دا اہم کردار اے ۔