حج فلائٹ آپریشن خمیس 9مئی توں شروع تھیسی

اسلام آباد۔7مئی (اے پی پی):عازمین حج کوں حجاز مقدس پڄاوݨ سانڳے حج آپریشن خمیس 9مئی کوں شروع تھیسی جیڑھا ھک مہینے تئیں جاری رہسی ۔وزارت مذہبی امور موجب حج 2024 سانڳے فلائٹ آپریشن 9 مئی توں 9 جون جاری رہسی ،پہلے 15 ݙینھ ساریاں پروازاں براہ راست مدینہ منورہ پڄسن ۔ 24 مئی توں 9 جون ٻہوں ساریاں پروازاں جدہ ایئرپورٹ تے لہسن ،فلائٹ آپریشن دے پہلے ݙینھ 11 پروازاں دے ذریعے 2160 عازمین سعودی عرب روانہ تھیسن۔اسلام آباد توں 3 پروازاں دے ذریعے 680 عازمینِ حج سعودی عرب روانہ تھیسن۔کراچی توں 02 پروازاں دے ذریعے 330 مسافر روانہ تھیسن ۔ لاہور توں 03 پروازاں دے ذریعے 670 مسافر روانہ تھیسن۔ترجمان آکھیے ملتان توں ݙو پروازوں دے ذریعے 329 عازم کرام سفر حج دا آغاز کریسن ۔ سیالکوٹ توں ھک پرواز دے ذریعے 151 عازمینِ کرام مدینہ منورہ پڄسن ،کوئٹہ توں پہلی حج پرواز 11 مئی کوں روانہ تھیسی ۔سکھرتوں پہلی حج پرواز 27 مئی کوں روانہ تھیسی ۔ 259 حج پروازاں دے ذریعے 68 ہزار توں ودھ سرکاری عازمینِ حج سعودی عرب پڄسن ۔ ترجمان آکھیے حج فلائٹ آپریشن 9 جون کوں مک ویسی جݙاں جو 20 جون کوں پہلی پرواز حجاجِ کرام کوں گھن تے وطن واپس آسی۔