لاہور۔7مئی (اے پی پی):وفاقی وزیرداخلہ محسن نقوی دی صدارت اچ ایف آئی اے لاہور زونل آفس اچ ھک اہم اجلاس تھئے ۔اجلاس اچ اوور بلنگ اتے بجلی چوراں دے خلاف کارروائی تے پیش رفت داجائزہ ڳھدا ڳئے ۔ وفاقی وزیرداخلہ گزریل دورے اچ ݙتی ڳئی ہدایات تے پیش رفت دا جائزہ وی ڳھدا۔ ایں موقع تے ڈائریکٹر ایف آئی اے لاہور سرفراز ورک بریفنگ وی ݙتی۔وفاقی وزیرداخلہ محسن نقوی اووربلنگ اتے بجلی چوری روکݨ سانڳے کریک ڈائون تکھا کرݨ دا حکم ݙیندے ہوئیں آکھیے جو اووربلنگ دے ذریعے شہریاں تے ٻوجھ پاوݨ آلے افسراں دے خلاف بلا امتیاز کارروائی جاری رکھی ونڄے تے اووربلنگ تے زیرو ٹالرنس پالیسی جاری رہسی ۔ محسن نقوی آکھیے ڈسکوز دی نااہلی تے غفلت دی سزا شہریاں کوں ݙیوݨ قطعا قبول کائنی۔ بجلی صارفین کوں اوور بلنگ اچ ریلیف ݙیوݨ ترجیح اے۔وفاقی وزیر بجلی چوراں دے خلاف کارروائی جاری رکھݨ دا حکم ݙیندے ہوئیں آکھیے جو بجلی چوری اچ ملوث سرکاری عملے دے خلاف وی بلاتفریق ایکشن ڳھدا ونڄے ۔ ڈی جی ایف آئی اے اسحاق جہانگیر ویڈیولنک تے اجلاس اچ شریک تھئن۔
