اسلام آباد۔8مئی (اے پی پی) وفاقی وزیرداخلہ محسن نقوی 20، 20 سال توں نان ڈویلپ سکیٹرز کوں فوری ڈویلپ کرݨ اتے اسلام آباد دی اراضی کوں ڈیجیٹلائز کرݨ دی ہدایت ݙے ݙتی۔ وفاقی وزیر داخلہ محسن نقوی بدھ کوں سی ڈی اے دا دورہ کیتا جتھ ترائے گھنٹے دا اجلاس تھیا۔ چیئرمین سی ڈی اے محمد علی رندھاوا وفاقی وزیر داخلہ دا استقبال کیتا۔ وفاقی وزیر کئی سالیں توں رقم ݙیوݨ دے باوجود پلاٹ نہ ڳھنݨ آلیاں کوں پلاٹ جلدی ݙیوݨ دی ہدایت ݙیندیں ہوئیں آکھیا جو پلاٹ دا قبضہ جلدی ݙیوݨ بارے حکمت عملی ٻݨائی ونڄے۔ رقم ݙیوݨ دے باوجود پلاٹ دا قبضہ نہ ݙیوݨ شہریاں نال زیادتی اے جیڑھی جو قبول کائنی۔ وفاقی وزیرداخلہ محسن نقوی اسلام آباد دی اراضی دا ریکارڈ ڈیجیٹلائزڈ کرݨ دا حکم ݙیندیں ہوئیں سی ڈی اے کوں چھی مہینے اچ لینڈ ریکارڈ کوں کمپیوٹرائزڈ کرݨ دا ٹاسک ݙے ݙتا۔
