اسلام آباد۔8 مئی(اے پی پی)وزیراعظم محمد شہباز شریف ملک اچ تعلیم دے ودھارے کیتے تعلیمی ایمرجنسی دا اعلان اتے سکول توں ٻاہرو 2 کروڑ 60 لکھ ٻالاں دے سکولاں اچ اندراج دا عزم دوہریندے آکھیے جو پاکستانی قوم عزم و حوصلہ نال کہیں وی چلینج تے قابو پا سڳدی اے، ملک اچ تعلیم دے شعبہ دی آپ نگرانی کریساں، ہک مٹھ تھی ونڄوں تاں پاکستان ہر شعبے اچ اپݨا ناں ٻݨیسی۔ اے ڳالھ انہاں شعبہ تعلیم بارے قومی کانفرنس نال خطاب اچ آکھی۔ انہاں آکھیا جو ٻالاں اچ غذائی کمی ہک وݙا چیلنج اے جیندے تے قابو پاوݨا ہوسی، تعلیم دے ودھارے کیتے ودھ مالی وسائل لیسوں، دہشت گردی دے خلاف جنگ نہ صرف پاکستان اچ ٻھل ڄڳ اچ امن سانڳے شروع کیتی ہئی۔ انہاں ماضی اچ تعلیم دی ترقی کیتے حکومتی اقدامات ڳݨوائے۔ وزیراعظم آکھیے جو سکول توں ٻاھرو ٻالاں کوں تعلیم ݙیوݨ دا چیلنج اوکھا ضرور اے ٻھل ناممکن نئیں، پنجاب آلی کار ملک اچ تعلیم دے فروغ کیتے اقدامات کریسوں۔ پاکستان دا معاشرہ تیکھے تعلیم یافتہ معاشرہ ٻݨسی۔ کانفرنس نال وفاقی وزیرتعلیم و پیشہ وارانہ تربیت ڈاکٹر خالد مقبول صدیقی، پاکستان اچ یونیسیف دے نمائندے عبد اللہ اے فاضل اتے پاکستان اچ برطانیہ دی ہائی کمشنر جین میریٹ سودھا عالمی ادارہ خوراک دی نمائندہ کوکو اوشی یاما وی خطاب کیتے۔ عالمی بینک دے نائب صدر مارٹن ریزر وی خطاب کیتے۔
