اسلام آباد۔9مئی(اے پی پی):صدر مملکت آصف علی زرداری چنڳے مستقبل دی تعمیر ، سیاسی تقسیم اتے نفرت مکاوݨ سانڳے اجتماعی کوششاں دی لوڑھ تے زور ݙیندے ہوئیں آکھیے جو 9 مئی پاکستان دی تاریخ اچ یوم ِ سیاہ دے طور تے یاد رکھیا ویسی ، نینگراں کوں ریاستی اداریں دے خلاف اکساوݨ دی بجائے انہاں دی صلاحیتاں کوں ملکی مفاد اچ بروئے کار گھن آوݨ دی لوڑھ اے ۔ ساریاں سیاسی جماعتاں رواداری اتے جمہوری اقدار دے ودھارے سانڳے کم کرن۔ ایوان صدر دے پریس ونگ توں جاری بیان موجب صدر مملکت آکھیے 9 مئی کوں سیاسی طورتے مشتعل ہجوم پورے ملک اچ کہرام مچایا، مشتعل ہجوم سرکاری املاک اتے فوجی تنصیبات کوں ضیان پڄائے ۔ صدر 9 مئی دے پرتشدد واقعات دی مذمت کریندے ہوئیں آکھیے انہاں واقعات توں ملک دا تاثر بری طرح متاثر تھئے، پرتشدد واقعات توں صرف پاکستان دشمناں دے مفادات پورے تھئن ، اے حملے ریاستی رٹ ، قانون دی حکمرانی اتے ادارے کمزور کرݨ دی کوشش ہن ۔ صدر مملکت آصف علی زرداری آکھیے جو پرامن مظاہرے اتے تعمیری تنقید جمہوریت دی روح ہن ، آئین ِپاکستان اچ اجتماع اتے اظہار رائے دے بنیادی حقوق ݙتے ڳئن ۔بنیادی حقوق کوں آئین اتے قانون دے مطابق ٻہوں ذمہ واری نال استعمال کیتا ونجݨا چاہیدے ۔ انہاں آکھیے بنیادی حقوق دا غلط استعمال کرتے تشدد تے اکساوݨ دی کہیں وی کوشش کوں ہرگز برداشت نہ کریسوں ، ذمہ دار جمہوریتاں اچ سیاسی مفاد سانڳے ریاستی املاک دی تباہی ، بھن تروڑ کݙاہیں نی ݙٹھی ۔صدر مملکت پاکستان دی مسلح افواج اتے ایندے اداریں تے فخر کریندے ہوئیں آکھیے پاکستانی مسلح افواج مختلف خطریں توں قوم دے دفاع اچ پیش پیش رہین ، 9 مئی کوں تشدد دے ذمہ واراں کوں قانون دے مطابق جوابدہ ٹھہراوݨا چاہیدے ، پاکستان کوں پہلے ہی ٻہوں سارے چیلنج دا سامݨا اے ۔
