پاکستان اتے قطر کوں آپسی دلچسپی دے سارے شعبے خصوصی طور تجارت تے سرمایہ کاری اچ ݙوپاسہ تعاون کوں مضبوط کرݨ کیتے رَل تے کم جاری رکھݨا چاہیدے، وزیراعظم شہباز شریف دی قطر دے وزیر مملکت برائے خارجہ نال ملاقات اچ ڳالھ مہاڑ

اسلام آباد۔9مئی (اے پی پی) وزیراعظم محمد شہباز شریف آکھیا جو پاکستان اتے قطر کوں آپسی دلچسپی دے سارے شعبے خصوصی طور تجارت تے سرمایہ کاری اچ ݙوپاسہ تعاون کوں مضبوط کرݨ کیتے رَل تے کم جاری رکھݨا چاہیدے۔ خمیس کوں وزیراعظم آفس دے میڈیا ونگ توں جاری بیان موجب وزیر اعظم محمد شہباز شریف نال قطر دے وزیر مملکت برائے خارجہ امور ڈاکٹر محمد بن عبدالعزیز الخلیفی وزیر اعظم ہاؤس اچ ملاقات کیتی۔ قطری وزیر مملکت برائے خارجہ اتے انہاں دے وفد دا خیر مقدم کریندیں ہوئیں وزیراعظم آکھیا جو پاکستان قطر نال آپݨے تاریخی ، دوستانہ اتے برادرانہ تعلقات کوں ٻہوں اہمیت ݙیندے۔ انہاں آکھیا جو ݙوہیں ملکاں ہمیشہ ہک ݙوجھے دا ساتھ ݙتے۔ وزیر اعظم قطر دے امیر شیخ تمیم بن حمد الثانی اتے وزیر اعظم اتے وزیر خارجہ شیخ محمد بن عبدالرحمن بن جاسم الثانی کیتے نیک تمناواں دا اظہار کیتا۔ قطری وزیر مملکت آپݨے استقبال تے وزیراعظم دا شکریہ ادا کیتا اتے انہاں کوں قطر دی قیادت دا خصوصی سنیھا پڄایا۔