حکومت حاجیاں کوں ہر ممکن سہولتاں ݙیندی پئی اے ، حجاز مقدس وںڄ تے انتظامات دا خود جائزہ گھنساں ، چوہدری سالک حسین

لاہور۔10مئی(اے پی پی):صوبائی دارالحکومت لاہور توں  حج2024 سانڳے 287عازمین کوں گھن تے سرکاری حج پرواز حجاز مقدس سانڳے روانہ تھی ڳئی اے ۔ وفاقی وزیر مذہبی امور چوہدری سالک حسین عازمین حج کوں علامہ اقبال انٹرنیشنل ایئرپورٹ لاہور توں رخصت کیتے۔ عازمین حج کوں انہاں خصوصی تلقین کیتی جو او حجاز مقدس اچ اللہ دے مہمان اتے پاکستان دے سفیر بݨ تے ویندے پئن ، سعودی قوانین اتے ثقافت دا خیال رکھن،اللہ دے حضور جتھاں آپݨے تے رشتے داراں سانڳے دعا کریسن اتھاں خصوصی طور تے عالم اسلام بالخصوص پاکستان اچ امن، ترقی اتے خوشحالی سانڳے وی دعا کرن ۔علامہ اقبال انٹرنیشنل ایئرپورٹ تے سیرین ایئر فلائٹ ای آر 921 دی  سرکاری حج پرواز دے ذریعے 287 حجاز مقدس روانہ تھیوݨ آلے عازمین دی الوداعی تقریب توں خطاب اچ انہاں آکھیے جیڑھے لوک حج تے ویندے پئن او خوش نصیب ہن تے ایں خوشی نصیبی تے جتنا وی شکر ادا کرن او گھٹن اے ۔ اتھاں ایں موقع تے موجود ہووݨ میں سانڳے فخر تے اعزاز دی ڳالھ اے ۔ وفاقی وزیر آکھیے میں خود وی ترائے چار ݙینھ تئیں روانہ تھیساں اتھاں خود انتظامات دا جائزہ گھنساں، سعودی عرب اچ پاکستانی حاجیاں کوں مسئلے تے انہاں دے حل سانڳے انہاں دے درمیان موجود رہ تے انہاں کوں سہولتاں ݙیوݨ سانڳے ہر ممکن قدم چیساں ۔