آزاد کشمیر اچ احتجاجی تحریک اچ شر پسنداں ولوں صورتحال کوں وڳاڑݨ دی کوششاں ناکام تھی ڳئن، وزیراعظم شہبازشریف دا آزاد کشمیر کابینہ دے اجلاس توں خطاب

مظفر آباد۔16مئی  (اے پی پی) وزیراعظم محمد شہبازشریف آکھیا جو آزاد کشمیر اچ احتجاجی تحریک اچ شر پسنداں ولوں صورتحال کوں وڳاڑݨ دی کوششاں ناکام تھی ڳئن۔ معاملے کوں بہتر طریقے نال حل کر ڳھدا ڳئے۔ آزاد کشمیر دی عوام پاکستان نال والہانہ محبت کریندن، پاکستان کشمیری عوام کیتے پوری دنیا اچ آواز چیندا رہسی۔ بھارت دے غیر قانونی قبضے اچ جموں تے کشمیر اچ فلسطین دی صورتحال تے دنیا چپ اے، او ݙینھ پرے نی جڈاں کشمیری اتے فلسطینی عوام کوں انہاں دے حق ملسن۔ اے ڳالھیں انہاں خمیس کوں آزاد کشمیر کابینہ دے اجلاس توں خطاب کریندیں ہوئیں آکھی۔ وزیراعظم آکھیا جو اللہ تعالیٰ  دے فضل و کرم نال پچھلے ݙینھ اچ تھیوݨ آلے واقعے بہتر طریقے نال حل تھین۔ صورتحال کوں کنٹرول کرݨ اچ کردار ادا کرݨ تے صدرمملکت اتے اتحادیاں دا شکر گزار ہم۔ تحریک چلاوݨ آلیاں آپݨے جائز معاملے کیتے ہک جمہوری انداز اچ آپݨا احتجاج ریکارڈ کرائے۔  پاکستان دے  25 کروڑ عوام  کشمیریاں دی قربانیاں کوں قدر نال ݙیکھدن۔ کشمیری عوام کیتے پاکستان پوری دنیا اچ آواز چیندا رہسی۔ او آئی سی  دی کانفرنس اچ وی نائب وزیراعظم اتے وزیر خارجہ اسحاق ڈار کشمیری عوام کیتے بھرپور آواز چاتی اتے جیڑھا اعلامیہ جاری تھیا اوندے اچ کشمیر دا بھرپور طریقے نال ذکر کیتا ڳئے۔ ایران دے صدر  ڈاکٹر ابراہیم رئیسی  دے دورہ  پاکستان دے موقع تے پریس کانفرنس اچ کشمیردی ڳالھ بھرپور طریقے نال کیتی اتے مسئلہ کشمیر تے چنڳی ڳالھ تھئی اے۔ ایں موقع تے وفاقی وزیر برائے امور کشمیر وگلگت بلتستان انجینئر امیر مقام، وفاقی وزیر صنعت و پیداوار رانا تنویر حسین، وفاقی وزیر داخلہ محسن نقوی ، وفاقی وزیر اطلاعات و نشریات عطاء اللہ تارڑ اتے وزیر اعظم آزاد کشمیر چوہدری انوار الحق وی موجود ہن۔ ایں موقع تے   آزاد کشمیر اچ احتجاجی تحریک  اچ جاں بحق تھیوݨ آلیاں کیتے ایصال ثواب کیتے فاتحہ خوانی وی کیتی ڳئی۔