صدر آصف علی زرداری دا ایرانی صدر سید ابراہیم رئیسی دی ہیلی کاپٹر حادثے اچ وفات تے اظہارتعزیت

اسلام آباد۔20مئی(اے پی پی):صدرمملکت آصف علی زرداری ایرانی صدر سید ابراہیم رئیسی دی ہیلی کاپٹر حادثے اچ وفات تے ݙکھ تے افسوس کریندے ہوئیں آکھیے جو صدر ابراہیم رئیسی امت مسلمہ دے اتحاد دے وݙے حامی ہن، عالم اسلام ھک عظیم رہنما توں محروم تھی ڳئے۔ ایوان صدر دے پریس ونگ توں جاری بیان موجب صدر مملکت اپݨے تعزیتی پیغام اچ صدر مملکت آصف علی زرداری ایرانی صدر، وزیر خارجہ اتے حادثے اچ جاں بحق تھیوݨ آلے ٻئے لوکاں دے ݙکھی خاندان نال دلی تعزیت کیتی ۔ صدر مملکت مسلم امہ سانڳے سابق صدر ابراہیم رئیسی دی خدمات کوں خراج تحسین پیش کریندے ہوئیں آکھیے ایرانی صدر فلسطینی اتے کشمیری عوام سودھے عالمی سطح تے مسلماناں دے درد کوں دل توں محسوس کریندے ، اڄ پاکستان ھک عظیم دوست کوں ونڄا ݙیوݨ تے ݙکھی اے ۔ انہاں آکھیے گزریل مہینے اساکوں پاکستان اچ انہاں دی میزبانی دا اعزاز ملیا ۔ ساݙی ڳالھ مہاڑ اچ میں انہاں کوں ݙو پاسے تعلقات کوں تکڑا بݨاوݨ سانڳے پرعزم پاتے ، آغا رئیسی ہمیشہ پاکستان اتے ایندے عوام کوں خاص مقام ݙیندے ہن ۔ صدر رئیسی دا انتقال نہ صرف ایران بلکہ پوری امت مسلمہ سانڳے ھک وݙا ضیان اے ۔ انہاں آکھیے صدررئیسی کوں علاقائی اتے اسلامی ملکاں دے نال تعلقات ودھاوݨ دیاں کوششاں تے ایران، پاکستان اتے عالم اسلام اچ یاد رکھیا ویسی ۔ اللہ تعالیٰ انھاں دہ روح کوں سکون عطا فرماوے۔ ناقابل تلافی ضیان تے انہاں دے اہل خانہ تے ایران دے عوام کوں صبر ݙیوے۔