دورہِ چین دے طے معاہداں، مفاہمتی یادداشتاں تے عملدرآمد دی آپ نگرانی کریساں، وزیرِ اعظم محمد شہباز شریف

اسلام آباد۔6جولائی(اے پی پی)وزیرِ اعظم محمد شہباز شریف آکھیے جو دورہِ چین اچ طے تھیوݨ آلے معاہداں و مفاہمتی یادداشتاں تے عملدرآمد اچ کوئی کوتاہی برداشت نا کیتی ویسی، ایں سانڳے سارے عمل دی آپ نگرانی کریساں۔ اے ڳالھ انہاں اسلام آباد اچ دورہ چین اچ تھیوݨ آلے تعاون دے معاہداں و مفاہمتی یادداشتاں تے عملدرآمد بارے اعلی سطح جائزہ اجالس اچ آکھی۔ انہاں آکھیا جو چین ساݙا چنڳاں سنڳتی اے ڄئیں ہر اوکھ سوکھ اچ ساݙا ہتھ ونݙائے، چین ڄڳ اچ ہک تکڑی معیشت ٻݨ تے اٻھریے جیندے توں اساں ٻہون کڄھ سیکھ سڳدے ہیں، چین توں انفارمیشن ٹیکنالوجی، مواصلات، معدنیات وکان کنی اتے توانائی دے شعباں اچ تعاون دا نواںد ور شروع تھیندا پئے جیندے نال معاشی ترقی، علاقائی روابط دی مضبوطی اتے ݙوطرفہ تعلقات ڳھاٹے تھیسن، اجلاس اچ ݙسایا ڳیا جو چینی جوتا ساز کمپنیاں دے وفد پاکستان اچ اپݨے کارخانے منتقل کرݨ کیتے پاکستان دا دورہ کیتے اتے ایں شعبے اچ چین ولوں پاکستان اچ 5 توں 8 ارب ڈالر دی سرمایہ کاری دی استعداد موجود اے، برآں زرعی شعبے دی 12 معروف چینی کمپنیاں اڄوکے سال پاکستان اچ تھیوݨ آلے فوڈ اینڈ ایگری ایکسپو اچ شرکت کریسن۔ وزیرِ اعظم زرعی شعبے اچ جدید تربیت کیتے پاکستانی ہک ہزار طلبہ سرکاری وظیفے تے چین بھیڄݨ دی اڳونہی پچھی اتے اکھیا جو چارے صوبیاں، بشمول گلگت بلتستان اتے آزاد کشمیر دے طلبہ کوں میرٹ تے چین ٻھیڄیا ونڄے، بلوچستان کوں خصوصی ترجیح ݙیو۔ اجلاس اچ ݙسایا ڳیا جو دورہ چین دے معاہدیاں پاروں 100 توں ودھ چینی کمپنیاں پاکستانی کمپنیاں نال پاکستان اچ کاروبار و سرمایہ کاری کیتے رابطے اچ ہین، اجلاس کوں وزارت انفارمیشن ٹیکنالوجی ہواووے ولوں 3 لکھ طلباء دی فنی تربیت، کاروبار دی سہولت کیتے ون اسٹاپ آپریشن اتے اسمارٹ گورننس و اسمارٹ سٹی تے اڳونہی دا ݙسایا ڳیا۔ وزیرِ اعظم  واپڈا کوں داسو اتے دیامر بھاشا تے چینی باشنداں دی سکیورٹی فول پروف ٻݨآوݨ کیتے سیف سٹیز ٻݨاوݨ دی ہدایت ݙیندے اے منسوبے تیکھے مکمل کرݨ دا آکھیا۔ اجلاس اچ پاکستان اچ چین ولوں مختلف مواصلاتی ڈھانچے، بجلی اتے گوادر منصوبیاں تے اڳونہی دا وی ݙسایا ڳیا۔ وزیرِ اعظم گوادر کوں خطے اچ تجارتی راہداری دا مرکز ٻݨآوݨ کیتے گوادر بندرگاہ، گوادر ہوائی اڈے اتے گوادر صنعتی زون دی ترقی دے اقدامات دی ہدایت کیتی اتے آکھیا جو چینی شمسی پینلز، آلات ساز کمپنیاں نال پاکستان اچ کارخانے منتقل کرݨ کیتے تیکھے مذاکرات کیتے ونڄن۔ اجلاس اچ نائب وزیرِ اعظم و وزیرِ خارجہ محمد اسحاق ڈار، وفاقی وزراء جام کمال خان، عطاء اللہ تارڑ، عبدالعلیم خان، سردار اویس خان لغاری، ڈاکٹر مصدق ملک، رانا تنویر حسین، محمد اورنگزیب، احسن اقبال، وزیرِ مملکت شزہ فاطمہ خواجہ، معاون خصوصی طارق فاطمی، ڈپٹی چیئرمین پلاننگ کمیشن جہانزیب خان اتے متعلقہ اعلی حکام موجود ہن