خیبر پختونخوا اچ دہشت گردی، سرحد پار توں دراندازی، قومی سلامتی دے ٻیاں معاملیاں کوں ݙیکھدیں ہوئیں ایمرجنسی تے گورنر راج لاوݨ دا فیصلہ کیتا: وفاقی وزیرِ قانون

اسلام آباد۔15 اکتوبر (اے پی پی) وفاقی وزیرِ قانون اعظم نذیر تارڑ آکھیا جو وفاقی حکومت، صوبہ خیبر پختونخوا اچ دہشت گردی، سرحد پار توں دراندازی، قومی سلامتی دے ٻیاں معاملیاں کوں ݙیکھدیں ہوئیں ایمرجنسی تے گورنر راج لاوݨ دا فیصلہ کیتا جیڑھا جو آخری آپشن دے طور تے استعمال کیتا ڳیا، جتھاں قومی سلامتی دا مسئلہ آ ون٘ڄے اتھاں سیاست دی بجائے ریاست کوں اہمیت ݙتی ویندی اے، ایں سارے عمل کوں جمہوری تے آئینی انداز اچ پاۓ تکمیل تئیں پڄاوݨ دا تمام تر اختیار پارلیمنٹ کول اے۔ خمیس کوں پارلیمنٹ دے سانجھے اجلاس اچ صوبہ خیبر پختونخوا اچ ایمرجنسی تے گورنر راج دے نفاذ دے حوالے نال پیش کردہ صدارتی حکمنامے تے بحث دا آغاز کریندیں ہوئیں انہاں آکھیا جو گزریل ݙینھ قومی اسمبلی تے سینیٹ اچ صدرِ مملکت ولوں صوبہ خیبر پختونخوا اچ آئین دے آرٹیکل 232 تے 234 دے تحت ایمرجنسی تے گورنر راج دے نفاذ دے حوالے نال قرارداداں دی منظوری ݙتی اے اتے انہاں ایں سارے عمل دی قرارداداں دی منظوری دے ذریعے توثیق کر ݙتی اے۔ انہاں آکھیا جو 1973ء دا آئین ہک متفقہ دستاویز اے جئیں کوں وݙی باریک بینی نال بݨایا ڳیا، ݙوہیں ایواناں انہاں قرارداداں دی منظوری ݙتی کیونجو اٹھارویں ترمیم اچ ݙوہیں ایواناں دے انڄ اناڄ اجلاساں اچ ایں صورتحال دا جائزہ گھدا ون٘ڄے تے ایں طرح اے وی ہک آئینی تقاضا ہا جو ݙوہیں ایوان انڄ اناڄ ایں دا جائزہ گھن تے قرارداداں دے ذریعے ایں دی توثیق کرن۔ ایں حوالے نال اے وی وݙی اہمیت دا حامل نقطہ اے جو ایں سارے عمل کوں جمہوری انداز اچ پاۓ تکمیل تئیں پڄایا ون٘ڄے تانجو کہیں کوں اعتراض نہ ہووے۔ صدرِ مملکت صوبے دی صورتحال تے اپنے مکمل اطمینان دے بعد اے حکم نامہ جاری کریندے ہن۔ اے مقتدر ایوان اے ایں اچ وݙے تحمل نال ارکان انہاں دستاویزات تے ڳالھ مہاڑ کریندن اتے ایں دے بعد ایں دی منظوری ݙتی ویندی اے۔ پارلیمنٹ دا سانجھے اجلاس صدرِ مملکت طلب کیتے تے اساں سب اتھاں موجود ہیں۔ پارلیمنٹ دے ݙوہیں ایواناں آپݨی آئینی ذمہ داری نبھیندے ہوئیں انہاں ݙوہیں امور تے بحث کیتی اے۔ گزریل ݙینھ وی اساں انہاں وجاوات تے محرکات تے اظہارِ خیال کیتا جو او کیجھے حالات ہن تے کیا ضرورت ہئی جو ایمرجنسی تے گورنر راج دا نفاذ کیتا ڳیا۔ آئین جیڑھا مینڈیٹ ݙتا ایں دے مطابق عمل کیتا ڳیا تے اے ہک جمہوری طریقہ اے۔ انہاں آکھیا جو ایں سارے معاملے اچ ہک بہت وݙا حصہ سرحد پار توں مداخلت دا اے۔ وفاقی وزیرِ داخلہ خود پشاور ویندے رہے۔ ایپکس کمیٹی دے اجلاس وی تھئے۔ انہاں آکھیا جو ڈیرہ اسماعیل خان، ٹانک تے باجوڑ اچ ہکے ݙینھ دہشت گردی دے واقعات تھئے تے لوکاں دی شہادتاں تھئیاں جیندے تے انہاں لوکاں دے گھراں اچ صفِ ماتم وچھی ہوئی اے۔ صوبائی حکومت دے سربراہ کوں ایں صورتحال اچ اتھاں موجود ہووݨا چاہیدے نہ جو انہاں کوں جلساں اچ میوزک لا تے جشن دا سماں بݨاوݨا چاہیدے۔ انہاں آئین دے آرٹیکل 234 دا حوالہ ݙیندے ہوئیں آکھیا جو گورنر ایں صورتحال دی صدرِ مملکت کوں باقاعدہ نشاندہی کریندے ہن جیندے بعد اے ایکسرسائز کیتی ڳئی۔ قومی سلامتی دے معاملے عدالتاں اچ وی جݙݨ ڳئے تاں انہاں کوں ان کیمرہ غور کیتا ڳیا۔ آئین دے آرٹیکل 232 دا حوالہ ݙیندے ہوئیں انہاں آکھیا جو صوبے دی اندرونی صورتحال وی خراب ہئی۔ 2010ء توں صوبہ خیبر پختونخوا اچ دہشت گردی نال نبڑݨ کیتے این ایف سی دا ہک فیصد اضافی ݙتا ڳیا جیڑھا جو ایں سال 13 ارب بݨدے۔ ہݨ اے سارا ایں ایوان دا اختیار اے جو او ایں دا جائزہ گھنے، آئینِ پاکستان دے تحت تمام تر اختیار ایں ایوان کول اے۔