موسمیاتی تبدیلی نال نبݨݨ سانڳے صنفی برابری اتے آبادی منصوبہ بندی تے توجہ ݙیوݨ دی لوڑھ اے ، رومینہ خورشید عالم

اسلام آباد۔10جولائی(اے پی پی) وزیراعظم دی کوآرڈینیٹر موسمیاتی تبدیلی اتے ماحولیاتی رابطہ رومینہ خورشید عالم آکھیے انسانی زندگی کوں ضیان پڄاوݨ آلیاں گیساں دے خارج تھیوݨ کوں گھٹ کرتے بدلدلے موسم دے اثرات نال نبڑیا ونڄ سڳدے۔ ورلڈ پاپولیشن ڈے تے آپݨے ھک سنھیے اچ انہاں آکھیے موسمیاتی تبدیلی نال نبݨݨ سانڳے صنفی برابری اتے آبادی منصوبہ بندی تے توجہ ݙیوݨ دی لوڑھ اے۔ ہر سال 11 جولائی کوں عالمی آبادی دا ݙینھ مناوݨ دا ایہو مقصد اے ۔ انہاں آبادی دے ودھدے مختلف رجحان تے موسمیاتی تبدیلیاں وچال تعلق کوں سمجھݨ دی اہمیت تے زور ݙتا ۔ وزیراعظم دی کوآرڈینیٹر چتاوݨی ݙتی اے جو زمین دی ودھدی حدت دے اثرات کوں گھٹ کرݨ تے ایں موجب انسانی زندگی کوں ڈھالݨ سانڳے موثر حکمت عملی اپناوݨی ہوسی ۔ انہاں آپݨے سنھیے اچ ایں ڳالھ تے زور ݙتے جو آبادی اچ خطرناک حد تئیں ودھارے تے بے ہنگم کھنڈدی آبادیاتی دے رجحان بالخصوص موسمیاتی تبدیلی تے ایندے خراب اثرات تے سوچ وچار کرݨی ہوسی ۔ رومینہ خورشید عالم آکھیے جیویں جیویں عالمی آبادی ودھدی پئی اے توانائی خوراک اتے وسائل دی منگ ودھدی پئی اے جیں پاروں فوسل فیول دے استعمال (تیل) جنگلاں دی کٹائی اتے صنعتی سرگرمیاں دے ودھدے خطرناک گیساں خارج تھیوݨ ودھ ڳئن ۔ آبادیاتی تبدیلیاں جیہے وݙی عمر دے لوکاں تے شہراں دے پاسے آبادی دے ودھدے دٻاؤ پاروں آب و ہوا تے ایندے خراب اثرات پئن لیکن موسمیاتی تبدیلی دی بنیادی وجہ خطرناک گیساں دا خارج تھیوݨ اے ۔ انہاں موسمیاتی تبدیلیاں پاروں خوراک دی پیداوار گھٹ تھیوݨ دے حوالے نال ݙر ظاہر کریندے آکھیے جنوبی ایشیا جیہے خطے خوراک دے عدم تحفظ تے غذائی قلت دا شکار تھی سڳدن  وزیراعظم دی معاون ایں ڳالھ تے زور ݙتے جو صنفی برابری کوں ودھارا ݙیوݨا ہوسی غریب پسماندہ اتے ترقی پزیر ملکاں اچ آبادی منصوبہ بندی دے ذریعے ممکنہ موسمیاتی تبدیلی نال نبݨݨ سانڳے موثر حکمت عملی اپناوݨی ہوسی موسمیاتی تے ماحولیاتی تبدیلیاں جیہے مسئلے نال نبݨݨ سانڳے ٹھوس حل ڳولݨ دی اجتماعی کوششاں تے زور ݙتا۔ انہاں آکھیے اڄ دا جڳ ݙیھاڑ عالمی سطح تے مناوݨ دا مقصد موسمیاتی تبدیلی اتے آبادی اچ مسلسل ودھارے تے صنفی عدم مساوات توں سامݨے آندے چیلنج نال نبݨݨ سانڳے وختی اقدامات چاوݨ اے ، انہاں آکھیے آب و ہوا بدلݨ پاروں قدرتی آفتاں جیہے خشک سالی ، چھل تے شدید درجہ حرارت لوکاں کوں خطرے اچ پیندن ۔ خاص کراو لوک جیڑھے غربت زدہ تے عدم وسائل دا شکار ہن۔ موسمیاتی اثرات گھٹ کرݨ سانڳے آبادی منصوبہ بندی اتے موثر حکمت عملی اپناوݨ دی لوڑھ تے زور ݙیندے وزیراعظم دی کوآرڈینیٹر رومینہ خورشید عالم آکھیے ودھدی آبادی محفوظ بݨاوݨ دے مختلف پہلوواں تے موسمیاتی تبدیلی دے منفی اثرات پوندن جنہاں اچ ماحولیاتی تحفظ، قابل استعمال پاݨی دی فراہمی اتے توانائی دی بچت اتے وݨ رہاوݨ دے پروگرام شامل ہن ۔ آبادی اچ مسلسل ودھارے تے موسمیاتی تبدیلی توں تھیوݨ آلی تباہی ، چھل خشک سالی اتے شدید گرمی توں متاثر لوکاں دی تعداد اچ ودھارے پاروں ڈیزاسٹر مینجمنٹ اوکھ دا شکار تھی ویندی اے وزیراعظم دی معاون رومینہ خورشید عالم محفوظ اتے پائیدار مستقبل سانڳے مؤثر تے جامع منصوبہ بندی بݨاوݨ تے زور ݙتا