کہیں وی چینل دے اشتہار بند نئیں کیتے،”ایکس“ تے پابندی نگران دور اچ لڳی ہئی، وفاقی وزیر اطلاعات دی سینیٹ دی قائمہ کمیٹی اطلاعات دے اجلاس اچ ڳالھ مہاڑ

اسلام آباد۔10جولائی(اے پی پی)وفاقی وزیر اطلاعات، نشریات، قومی ورثہ و ثقافت عطاء اللہ تارڑ آکھیے جو کہیں وی چینل دے اشتہار بند نئیں کیتے،”ایکس“ تے پابندی نگران دور اچ لڳی ہئی، ڈیجیٹل رائٹس پروٹیکشن اتھارٹی دے معاملہ تے صلاح مشورہ تھیندا پئے، اساں صحافیاں کیتے ہیلتھ انشورنس سکیم بحال کیتی۔ اے ڳالھ انہاں پارلیمنٹ ہائوس اسلام آباد اچ سینیٹر سید علی ظفر دی اڳواݨی اچ تھیوݨ آلے سینیٹ دی قائمہ کمیٹی برائے اطلاعات و نشریات دے اجلاس اچ آکھی۔ اجلاس اچ وزارت اطلاعات و نشریات اتے ایندے ماتحت اداراں دے کم دے طریقہ کار، ذمہ داریاں دے امور سودھا فائر وال بارے معاملیاں تے بریفنگ ݙتی گئی۔ وفاقی وزیر اطلاعات آکھیا جو اساں جمہوری روایات دے امین ہیں، وزارت اطلاعات قائمہ کمیٹی کوں پورا تعاون ݙیسی، کمیٹی دے نال چل تے کم کریسوں، ساݙے اڳواݨاں ساکوں سکھائے جو سیاسی مخالفین نال بغض اتے وانڄھ نا رکھو جو سیاسی مخالفت سیاسی دشمنی نئیں ہوندی، سیاسی مخالفین نال ملک دی تعمیر و ترقی دی ڳالھ کیتی ویندی اے اتے سیاست اچ ہک ٻئے خوشی غمی اچ رل تے ٹرݨا ہوندے، ساݙے اڳواݨ نواز شریف وی ہمیشہ پارلیمان دی بالادستی کوں اڳونہا رکھیے، انہاں دے دور حکومت اچ خارجہ پالیسی دے اہم اتے سنجیدہ معاملات تے پہلی واری ایوان اچ ووٹنگ نال فیصلہ تھئے، اظہار رائے دی آزادی کیتے 2017 اچ اطلاعات دی رسائی دا قانون وی ساݙے سر اے ڄیڑھا اوں ویلھے نواز شریف کیتا ہا، اے ویلھے دےی لوڑھ اے جو اساں اڄ حکومت اچ ہیں تے کل ول اپوزیشن اچ ہوسوں، کل کیہڑا اقتدار اچ ہوسی کئیں ڄاݨیے؟ ملکی مفادات دے معاملے تے تساں ساکون ہر کہیں کولو اڳو ݙیکھسو، میڈیا ورکرز اتے صحافیاں دے واجبات سانڳے کمیٹی کوں ݙسیندے انہاں آکھیا جو اساں نیوز انڈسٹری دے 1.6 ارب روپے دے واجبات ݙتن، بجٹ اچ نیوز پرنٹ تے کوئی ٹیکس نئیں لڳݨ ݙتا، انہاں اقدامات دے فیدے میڈیا ہائوسز اتے اخبارات ملازمین کوں ملین اتے کہیں دا استحصال نئیں تھیوݨا چاہیدا۔ وزیر اطلاعات آکھیا جو پاکستان براڈ کاسٹرز ایسوسی ایشن (پی بی اے) لکھ تے ݙتے جو ساݙے کولو آئی ٹی این ای دا فورم موجود اے جتھان ڳالھ سݨی ویندی اے جیندے ولوں اساں متاثرہ صحافیاں اتے میڈیا ورکرز کوں واجبات ݙتن، اے معاملات آئی ٹی این ای تے ونڄݨ دی بجائے میڈیا ہائوسز کوں آپ ݙیکھݨے چاہیدن۔ انہاں آکھیا جو کہیں وی پرائیویٹ ٹی وی چینل دے اشتہارات بند نئیں کیتے گئے، ساریاں کوں رینکنگ دے مطابق اشتہارات ملدن، اے پی این ایس کوں آکھیے جو او ڈمی اخبارات دا معاملہ آپ حل کرن۔ ایں موقع تے قائمہ کمیٹی ڈمی اخبارات دی اے پی این ایس توں رپورٹ منڳ ڳھدی۔ وزیر اطلاعات آکھیا جو حکومت پاکستان دا اپݨا ڈیجیٹل پلیٹ فارم ہووݨا چاہیدے جیندے کیتے پاک چائنہ فرینڈشپ سنٹر اچ کم کیتا ویسی، سنٹر فار ڈیجیٹل کمیونیکیشن دا ادارہ ٻݨیدے پئے ہیں، ملک اچ انٹرٹینمنٹ کون فروغ ݙیوݨ دی لوڑھ اے جیندے کیتے فلم انڈسٹری دی حوصلہ افزائی کرݨا ہوسی، غیر ملکی فلماں نال ساݙی آپݨی فلم انڈسٹری متاثر نئیں تھیوݨی چاہیدی۔