ملک اچ سرکاری شعبے دے ٻئی رہائشی منصوبے شروع کرݨ دی لوڑھ اے، میاں ریاض حسین پیرزادہ

اسلام آباد۔11جولائی  (اے پی پی) وفاقی وزیر ہائوسنگ اینڈ ورکس میاں ریاض حسین پیرزادہ آکھیا جو وفاقی سرکاری ملازماں کوں معیاری اتے سستی رہائش ݙیوݨ پہلی ترجیح اے۔ ملک اچ سرکاری شعبے دے ٻئی رہائشی منصوبے شروع کرݨ دی لوڑھ اے تانجو ہر کہیں کوں آپݨی چھت مل سڳے۔ اے ڳالھیں انہاں خمیس کوں پی ایچ اے فائونڈیشن دے ہائوسنگ پراجیکٹ I-16/3اچ تیار اپارٹمنٹس دی چابیاں الاٹیز دے حوالے کرݨ دی تقریب توں بطور مزمان خصوصی خطاب کریندیں ہوئیں آکھی۔ میاں ریاض حسین پیرزادہ ایں توں پہلے الاٹیز دے حوالے کیتے ڳئے اپارٹمنٹس دا وی دورہ کیتا اتے منصوبے دی کامیابی تے پی ایچ اے فاؤنڈیشن دی تعریف کیتی اتے معیاری کم تے ڈائریکٹر پراجیکٹ دی خدامت دی تعریف کیتی۔ ایں موقع تے چیف ایگزیکٹو آفیسر پی ایچ اے فائونڈیشن شاہد حسین وفاقی وزیر کوں 117ایکڑ دے کثیر المنزلہ رہائشی منصوبے بارے تفصیلی بریفنگ ݙتی اتے ݙسیا جو ایں منصوبے اچ وفاقی ملازماں اتے عام شہریاں کیتے مجموعی طور 672بی ٹائپ اتے 912ای ٹائپ اپارٹمنٹس ہن منصوبے اچ 51 دکاناں دا کمرشل بلاک وی شامل اے۔