تحمل، برداشت، ایثار وقربانی تے محنت نال آپݨے ہدف گھنڑن ، ایف بی آر دی ڈیجیٹلائزیشن داعمل جاری اے، ویلھا ونڄائے بغیر مزید چنڳائی دے پاسے ودھݨا ہوسی ، وزیراعظم محمد شہباز شریف دا ایف بی آر دورے تے خطاب

اسلام آباد۔13جولائی(اے پی پی) وزیراعظم محمد شہباز شریف آکھیے ٹیکس دے شعبے اچ ایجھا نظام بݨایا ونڄے کمزوریاں ہٹ سڳن ، تاجر تے کاروباری لوکاں کوں ٹیکس معاملات اچ ناجائز تنگ نہ کیتا ونڄے ، ایف بی آر کوں قومی مفاد دے حوالے نال جیڑھا کجھ وی چاہیدے او حکومت ݙیسی، ذاتی پسند نا پسند توں ھک پاسے رہ تے قومی مفاد کوں سامݨے رکھیا ونڄے ، معیشت کوں مستحکم کرݨا اے، تحمل، برداشت، ایثار وقربانی تے محنت نال آپݨے ہدف گھنݨے ہن ، ایف بی آر دی ڈیجیٹلائزیشن دا عمل جاری اے، ویلھا ونڄائے بغیر مزید چنڳائی آلے پاسے ودھݨا اے ۔ وزیراعظم محمد شہباز شریف اے ڳالھ فیڈرل بورڈ آف ریونیو (ایف بی آر) دے دورے تے اجلاس دی صدارت اچ آکھی اے ۔ انہاں آئی ایم ایف نال سٹاف لیول معاہدے تے وفاقی وزیر خزانہ ، وفاقی وزیر قانون، وزیر مملکت خزانہ ، سیکرٹری خزانہ تے ایف بی آر دی ٹیم سودھے متعلقہ حکام دی تعریف اچ آکھیے پوری ٹیم پروگرام سانڳے دلوں کم کیتے ۔ انہاں آکھیے ادارہ جاتی اصلاحات دے بغیر ممکن کائنی جو معاشی ترقی دے ہدف مل سڳن ۔ وزیراعظم آکھیے اساں معیشت مستحکم کرݨی اے معیشت دے مائیکرو اشارییں کوں سدھا کرݨا ہوسی جیں سانڳے اوکھے سفر کرݨ ضروری اے۔ اساکوں تحمل، برداشت، ایثار وقربانی تے محنت نال آپݨے ہدفت گھنݨے ہوسن جیں دے بغیر ترقی دا اے سفر مکمل نی تھی سڳدا ۔ انہاں آکھیے سٹاف لیول معاہدہ طے تھئے آئی ایم ایف بورڈ ایندی منظوری ݙیسی ۔ ہݨ ساݙی ذمہ واری شروع تھیندی پئی اے ہݨ ویلھا اے جو اساں وختی اقدامات یقینی بݨاؤں تاں ہی ایں پروگرام کوں آئی ایم ایف دا چھیکڑی پروگرام بݨا سڳسوں۔ وزیراعظم آکھیے ملک اچ ترقی تے خوشحالی دا نواں دور شروع تھیسی میں پوری قوم کوں یقین ݙوینداں جو اللہ دے فضل وکرم ، اجتماعی تے افرادی کوششاں نال انشا اللہ پاکستان ھک عظیم ، خوشحال تے قابل احترام ملک بݨسی۔ انہاں آکھیے جے اساں پاکستان دی قرضیں توں جند چھڑاوݨی اے تاں آئی ایم ایف دے ایں پروگرام کوں چھیکڑی پروگرام منݨا اے تے یقینی بݨاوݨے جو اے چھیکڑی پروگرام ہی ہووے انہاں آکھیے جیڑھا بندہ ٹیکس ݙیندے تے جیڑھا ٹیکس نادہندہ اے انھاں دے حوالے نال سوچ بدالݨی ہوسی تے عام آدمی جیڑھا ٹیکس ݙیندے اینکوں مراعات ݙیوݨیاں ہوسن ۔ جے ٹیکس ݙیوݨ دی صلاحیت آلے لوکاں توں ٹیکس وصول نہ کیتا ویسی تاں ملک ترقی نہ کرسڳسی تے عام بندے دی خوشھالی تے ترقی سانڳے وسائل جمع نہ تھیسن انہاں آکھیے عام بندے کوں ریلیف ݙیوݨ سانڳے تساکوں پوری حکمت عملی بدالݨی ہوسی ، ٹیکس محصولات اچ ودھارے سانڳے دنیا دے ٻئے ملکاں وانڳوں پالیسی بݨاوݨی ہوسی ، مصنوعی ذہانت دا دور اے تے ایندے ذریعے کجھ وی ناممکن نی رہیا ۔ وزیراعظم محمد شہباز شریف آکھیے جݙاں میں سݨداں جو اساں عالمی بینک ، جائیکا وغیرہ کوں لکھیے او اساکوں فنڈ ݙیندے پئن تاں میکوں وݙی تکلیف تھیندی اے انہاں آکھیے ایں توں جند چھڑاوݨی ہوسی ، نکیاں نکیاں چیزاں تے وسائل سانڳے اساکوں مالیاتی اداریں کنے نہ ونڄݨا پووے۔ انہاں آکھیے قومی تےعوامی مفاد سانڳے ایف بی آر کوں ٹیکس محصولات ودھاوݨ سانڳے جیڑھا کجھ وی چاہیدے حکومت ݙیسی ۔ قومی مفاد دا تحفظ ساݙی ذمے واری اے ۔ ایف بی آر ارباں کھرباں روپے دے محصولات کٹھے کریندے لیکن چند ارب روپے سانڳے اساکوں ورلڈ بینک اتے ٻئے مالیاتی اداریں کنے ونڄݨا پوندے قوماں ایویں نی بݨدیاں ، عالمی مالیاتی اداریں کنے اوں ویلھے ونڄݨا چاہیدے جݙاں مجبوری ہووے جتھاں اٹھ ݙاہ ارب روپے خرچ کرتے کھرباں کمائے ویندن اساکوں ایں کوں ترجیح ݙیوݨی ہوسی۔ وزیراعظم آکھیے ترجیحات دے تعین دا ویلھا آچکے اساکوں پوری تیار نال قوم دی خدمت سانڳے آپݨے آپ کوں وقف کرݨا ہوسی ایف بی آر اچ جیڑھی اصلاحات اتے تبدیلیاں گھن آئیاں ویندیاں پئن انہاں دا مقصد ٹیکس نادہندگان توں ٹیکس وصولی اتے ٹیکس ݙیوݨ آلیں کوں مراعات ݙیوݨ اے میݙی کوئی ذاتی پسند نا پسند کائنی صرف قومی مفاد میݙی اولین ترجیح اے۔ انہاں آکھیے سفارش دا تصور ہی نی کیتا ونڄ سڳدا اتے ایں تے کݙاہیں سمجھوتہ نہ کیتا ویسی انہاں آکھیے ایف بی آر دی ڈیجیٹلائزیشن دا عمل شروع تھی چکے ، ویلھا ونڄائے بغیر اڳوں ودھݨا ہوسی ۔ گزریل مالی سال اچ ایف بی آر دے محصولات اچ 30 فیصد ودھارا قابل تحسین اے لیکن ٹیکس نادہندگان تے ٹیکس لاوݨ ضروری اے تاں جو قوم کوں ݙسایا ونڄ سڳے جو او اے او شعبے ہن جیڑھے ٹیکس نہ ݙیندے ہن ۔ انہاں آکھیے1997 اچ پنجاب اچ پہلی واری زرعی ٹیکس اساں لاتا ہئی ، 12 ایکڑ دے کاشتکاراں کوں ٹیکس رعایت ملی ہوئی ہئی۔ 27 سال گزرݨ دے باوجود حالی تئیں ایں تے کوئی پیشرفت نی تھئی ۔ وزیراعظم آکھیے محصولات ودھاوݨ سانڳے ٹیکس نادہندگان ، بجلی تے ٻئے صارفین تے ٹیکس لاوݨ مسئلے دا حل کائنی انہاں آکھیے ٹیکس دے حوالے نال صوبیں نال مشورہ کیتا ڳئے انہاں آکھیے جے دل اچ جذبہ ہووے ملک دی خدمت دی تڑپ ہووے تاں اللہ تعالیٰ اپݨے خاص فضل تے کرم نال معاملات سوکھے کر ݙیندے ۔ انہاں مزید آکھیے اڄوکے مالی سال سانڳے ٹیکس محصولات دا ہدف اپݨی جاہ لیکن کہیں سرمایہ کار تے تاجر کوں بلاوجہ تنگ نہ کیتا ویسی ۔ انفورسٹمنٹ دے ناں تے تنگ کرݨ دی اجازت نہ ہوسی انہاں آکھیے ٹیکس دہندگان کوں سہولت تے عزت ݙتی ونڄے تے قابل وصول ٹیکس وصول کرݨ سانڳے اقدامات یقینی بݨائے ونڄن تاں جو قومی آمدݨ ودھ سڳے ۔ جے تساں ایمانداری تے محنت نال کم کریسوتاں تساکوں وی مراعات ملسن ۔وزیراعظم آکھیے مراعات دی پالیسی گھن آوݨی ہوسی ۔ انہاں آکھیے ایف بی آر اچ جدید ترین سسٹم گھن آیا ویسی پوری قوم کوں ݙکھیسوں جݙاں نیت اتے ارادے صحیح ہوون تاں فیصلہ کر ڳھدا ونجے اللہ تعالیٰ وی مدد کریندے ۔ اجلاس اچ وفاقی وزیر اقتصادی امور احد خان چیمہ ، وفاقی وزیر خزانہ و محصولات محمد اورنگزیب ، وفاقی وزیر قانون و انصاف اعظم نذیر تارڑ ، وزیرمملکت خزانہ و محصولات علی پرویز ملک ، ڈپٹی چیئرمین پلاننگ کمیشن جہانزیب خان ، چئیر مین ایف بی آر ملک امجد زبیر ٹوانہ ، ایف بی آر تے ٻئے متعلقہ اداریں دے افسراں شرکت کیتی