عراق اچ پاکستانی زائرین توں غیر قانونی طور ودھ فیس وصولی اچ ملوث ٹریول ایجنٹس دے خلاف ہفتے اچ کاروائی یقینی بݨائی ویسی ، وزیر داخلہ محسن نقوی

اسلام آباد۔14جولائی(اے پی پی) وزیر داخلہ محسن نقوی آکھیے عراق اچ زیارات سانڳے ونڄݨ آلے پاکستانی زائرین توں غیر قانونی  ودھ فیس وصولی اچ ملوث ٹریول ایجنٹس دے خلاف ھک ہفتے اچ کاروائی یقینی بݨائی ویسی ہر سال لکھاں پاکستانی زیارت سانڳے عراق ویندن،محرم تےصفر دے مہینے اچ زائرین کوں ٻہوں اوکھ تھیندی اے ساݙی کوشش اے جو زائرین کوں ہرممکن سہولتاں ݙتیاں ونڄن ۔عراقی حکومت دی طرفوں زائرین کوں بغیر فیس انٹری ویزا دی اجازت ملݨ دی صورت اچ زائرین کوں سہولت ملے ۔ اے ڳالھیں انہاں وزارت داخلہ اچ عراق دے سفیر حامد عباس لفتہ کوں ملاقات اچ آکھی اے ۔ اتھاں وفاقی وزیر اوورسیزپاکستانیز و مذہبی امور چوہدری سالک حسین وی موجود ہن۔ وزارت داخلہ آوݨ تے وزیر داخلہ محسن نقوی اتے وزیر اوورسیزپاکستانیز و مذہبی امور چوہدری سالک حسین عراقی سفیر دا خیرمقدم کیتا۔ ملاقات اچ عراق ونڄݨ آلے زائرین کوں ودھ توں ودھ سہولتاں ݙیوݨ سانڳے اقدامات تے ڳالھ مہاڑ تھئی جݙاں جو زائرین کوں بغیر فیس انٹری ویزا دی اجازت ݙیوݨ تے پاکستانی زائرین دا کوٹہ ودھاوݨ تے ڳالھ مہاڑ وی تھئی ۔ وزیرداخلہ محسن نقوی عراق ونڄݨ آلے زائرین کوں بغیر فیس انٹری ویزا ݙیوݨ تے اڄوکے سال زائرین دا کوٹہ ݙوگنا کرݨ دا مطالبہ کیتا ،۔ عراقی سفیر ایں ضمن اچ ممکن تعاون دا یقین ݙیوائے ۔ وزیرداخلہ محسن نقوی عراقی سفیر کوں زائرین توں غیر قانونی طور  ودھ فیس وصول کرݨ آلے ٹریول ایجنٹس دے خلاف کارروائی دا یقین ݙیوائے ، انہاں آکھیے پاکستانی زائرین توں عراق داخلے تے پاسپورٹ نہ ڳھدے ونڄن کیوں جو ایں توں انہاں کوں واپسی اچ اوکھ تھیندی اے ۔ عراقی سفیر وزیر داخلہ کوں انہاں معاملات تے زائرین سانڳے بہترین سہولتاں ݙیوݨ اچ مکمل تعاون دا یقین ݙیوائے ۔ملاقات اچ ڈپلومیٹک اتے آفیشل پاسپورٹ تے ویزا دی چھوٹ دے معاہدے کوں حمتی شکل ݙیوݨ تے اتفاق تھئے ۔ملاقات اچ وزارت سمندر پار پاکستانیز تے عراق دی وزارت لیبر وچال ایم او یو تے وختی دستخط کرݨ تے اتفاق کیتا ڳئے ۔سالک حسین  آکھیے ایم او یو دے فعال تھیوݨ نال پاکستانی شہریاں کوں عراق سانڳے ورک پرمٹ گھنݨ سوکھا ہوسی ۔ ایں ایم او یو نال قانونی امیگریشن ودھسی تے غیر قانونی طریقے نال داخلہ گھٹ تھیسی  ۔عراقی سفیر عراق دے وزیر داخلہ دی طرفوں محسن نقوی کوں وزارت داخلہ دا منصب سنبھالݨ دی مبارخ ݙتی تے عراق دورے دی دعوت ݙتی۔ملاقات اچ وفاقی سیکرٹری داخلہ خرم علی آغا تے عراقی سفارت خانہ دے اعلی حکام موجود ہن