وفاقی حکومت دا پی ٹی آئی تے پابندی لاوݨ، سپریم کورٹ دے اڄوکے فیصلے تے نظر ثانی دی اپیل دائر کرݨ اتے بانی پی ٹی آئی، ساق صدر عارف علوی اتے قاسم سوری تے آرٹیکل 6 لاوݨ دا فیصلہ کیتے، وفاقی وزیر اطلاعات عطا اللہ تارڑ

اسلام آباد۔15جولائی  (اے پی پی) وفاقی وزیر اطلاعات تے نشریات عطااللہ تارڑ آکھیا جو وفاقی حکومت دا پی ٹی آئی تے پابندی لاوݨ، سپریم کورٹ دے اڄوکے فیصلے تے نظر ثانی دی اپیل دائر کرݨ اتے بانی پی ٹی آئی، ساق صدر عارف علوی اتے قاسم سوری تے آرٹیکل 6 لاوݨ دا فیصلہ کیتے۔ آرٹیکل 6 لاوݨ دا ریفرنس سپریم کورٹ ٻھیجا ویسی، ملک مخالف سرگرمیاں اچ ملوث ٻاہرلے ملک ٻیٹھے لوکاں دے خلاف کاروائی تھیسی۔ ملک کوں اڳوں ڳھن وڄملے تاں شرپسنداں تے پابندی لاوݨی پوسی۔ آئی ایم ایف کوں خط لکھݨ پی ٹی آئی دے ملک دشمن ایجنڈے دا حصہ ہئی۔ ہک سیاسی جماعت کوں او حق ݙتا ڳئیا جیڑھا انہاں منڳیا ای کائنا ہئی۔ حکومت کہیں دے خلاف انتقامی کاروائی نہ کریسی۔ او سنوار کوں پی ٹی وی ہیڈ کوارٹر اچ پریس کانفرنس توں خطاب کریندے پئے ہن۔  وفاقی وزیر اطلاعات تے نشریات عطا اللہ تارڑ آکھیا جو گزریل ݙینھ ملک اچ ہیجانی کیفیت ٻݨاوݨ دی کوشش کیتی ڳئی۔ بانی پی ٹی آئی بدترین لیڈر اے، انہاں انتقام دی ٻھاہ کوں وسماوݨ کیتے ٻھیݨ، دھیریں کوں جیل اچ سٹݨ دی روایت پاتی۔ انہاں آکھیا جو اساݙی دانشمندی کوں اساݙی کمزوری سمجھیا ڳئیا۔ اساکوں کمزور سمجھیا ڳئیا اتے مندے ݙتے ڳئے۔ 2014 توں اڄ تئیں ہک مخصوص مائنڈ سیٹ کوں  ودھایا ڳئے۔ جݙاں فلسطین تے حملے تھیندے پئے ہن تاں انہاں دے رہنما اسرائیلی بزنس مین نال ٻہہ تے کھانا کیوں کھمدے پئے ہن۔ ملک نال ہݨ کھلواڑ نہ تھیوݨ ݙیسوں۔ انہاں آکھیا جو سنی اتحاد کونسل دا منشور اے جو کوئی غیر مسلم انہاں دی جماعت دا رکن نی ٻݨ سڳدا، اڄوکے فیصلے اچ تحریک انصاف کوں منڳئے بغیر ریلیف ݙتا ڳئیا۔ انہاں آکھیا جو حکومت اتے اتحادی جماعتاں سپریم کورٹ دے فیصلے دے خلاف نظر ثانی اپیل دائر کرݨ دا فیصلہ کیتے۔ انہاں آکھیا جو پی ٹی آئی انٹرا پارٹی الیکشن نی کرائے، انہاں دے ایم این ایز عدلیہ دے سامھے اے نی آکھیا جو اساں تحریک انصاف دے رکن ہیسے۔ انہاں آکھیا جو پی ٹی آئی ممنوعہ  ذرائع توں فنڈنگ ڳھدی اے۔ نو مئی کوں ملکی دفاع تے ذاتی فیدے اچ حملہ کیتا، بانی پی ٹی آئی دا پورا ٹبر ایندے اچ شامل ہئی، بانی پی ٹی آئی دی ترائے ٻھیݨیں کورکمانڈر ہاؤس دے ٻاہر موجود ہن۔ پی ٹی آئی حکومت ای ٹی ٹی پی کوں واپسی ڳھن آئی۔ انہاں نیشنل ایکشن پلان کوں ختم کیتا۔  وفاقی وزیر اطلاعا ت آکھیا جو  نواز شریف آپݨی ذال کوں بستر مرگ تے چھوڑ تے آئے، نواز شریف یکا پاکستان دی ڳالھ کیتی اے۔ ݙوجھے پاسوں پی ٹی آئی فارن فنڈنگ، نو مئی دے حملے اتے دہشت گرداں کوں واپسی ڳھن آئے۔ پی ٹی آئی سائفر دا ڈرامہ رچایا۔ وفاقی وزیر اطلاعات آکھیا جو انہاں وجوہات تے وفاقی حکومت تحریک انصاف تے پابندی لاوݨ کیتے کیس دائر کریسی۔ آئین حکومت کوں ملک مخالف سرگرمیاں اچ ملوث جماعت کوں پابندی لاوݨ دا اختیار ݙیندے۔ انہاں آکھیا جو تحریک انصاف غیر آئینی طور اسمبلیاں تروڑی، آئی ایم ایف کوں خط لکھیا۔ تحریک عدم اعتماد دے ہوندیں ہوئیں اسمبلیاں کوں تحلیل کیتا۔ اوں ویلھے دے صدر عارف علوی، وزیراعظم عمران خان نیازی اتے اوں ویلھے دے ڈپٹی سپیکر قاسم سوری دے خلاف آرٹیکل 6 دا ریفرنس کابینہ دی منظوری دے بعد سپریم کورٹ کوں ٻھجوایا ویسی۔ انہاں آکھیا جو ملک دے خلاف سازشاں اچ ملوث ٻاہرلے ملک موجود لابیاں دے خلاف حکومت کاروائی کرݨ دا فیصلہ کیتے۔ پاکستان توں ٻاہر بہہ تے ممنوعہ فنڈنگ وصول کر تے ملک دے خلاف مہم چلاوݨ آلیاں دے خلاف سخت قانونی کاروائی کیتی ویسی۔ انہاں آئی ایم ایف ڈیل کوں سبوتاژ کیتا، ملک کوں ڈیفالٹ دے دھانے تے پڄایا اتے سائفر نال کھلواڑ کیتا۔ انہاں ملک دشمن قوتاں کوں تقویت ݙتی اتے آپݨے سیاسی فیدے کیتے پاکستان دا نقصان کیتا۔ انہاں دے خلاف قانون اتے آئین دے مطابق کاروائی کیتی ویسی۔ (م ن، ج م) 15:51