ستویں خانہ تے مردم شماری 2023 دے نتیجے دا اعلان ،پاکستان دی کل آبادی 241.49 ملین

اسلام آباد۔18جولائی  (اے پی پی) ادارہ  برائے شماریات  پاکستان (پی بی ایس) 7ویں خانہ و مردم شماری 2023 ، “پہلی ڈیجیٹل مردم شماری” دے تفصیلی نتیجے دا اعلان کر ݙتے۔ پاکستان کل آبادی 241.49 ملین اے۔ پی بی ایس دے ترجمان  محمد سرور گوندل آپݨے بیان اچ آکھیا جو تفصیلی نتیجے اچ جنس، عمر، قوم، زبان، ازدواجی حیثیت، تعلیم ،معذوری، شہری اتے دیہاتی آبادی دا تناسب، ہاؤسنگ، پاݨی اتے حفظان صحت بارے قومی، صوبائی۔ ضلعی اتے تحصیل دی سطح تے معلومات شامل اے۔ انہاں آکھیا جو آبادی اچ ودھارے دی اڄوکے شرع 2.55 فیصد اے جیڑھی خطے دی بلندی ترین سطح اے۔ اگر اے شرح رہی تاں 2050 تئیں پاکستان دی آبادی ݙوگناہ تھی ویسی۔ وفاقی وزیر ولوں ستویں خانہ تے مردم شماری کراوݨ تے پاکستان ادارۂ شماریات کوں مبارخ ݙتی۔  پاکستان دی کل آبادی 241.49 ملین اے جئیں اچ 51.48 فیصد مرد اتے 48.51 فیصد تریمتیں ہن جنہاں دا صنفی تناسب 106.12 اے۔ پاکستان اچ  گھرانے دے افراد دی اوسط تعداد 6.30 اے۔غالب مذہب  اسلام اے، جیڑھا 96 فیصد آبادی دی نمائندگی کرندے۔36.47ملین آبادی پںج سال توں ڳھٹ عمر اے، 97.53 ملین آبادی 15 سال توں ڳھٹ عمر اے۔ 62.58 ملین آبادی 15 توں 29 سال وچال اے۔190.27 ملین آبادی 40 سال توں ڳھٹ عمر اے ۔پاکستان اچ ݙاہ سال اتے اوں توں ودھ عمر دی 61 فیصد آبادی خواندہ اے۔ 5 توں 16 سال دی عمر دے تقریبا ہک تہائی ٻال ایں ویلھے سکولاں ٻاہر ہن۔ مردم شماری موجب کل  38,318,107 عمارتاں ہن جئیں اچ 114,159 بلند عمارتاں ہن ۔ انہاں آکھیا جو وفاقی وزیر احسن اقبال پاکستان ادارۂ شماریات  دے افسراں کوں پاکستان دی ستویں خانہ تے مردم شماری مکمل کرݨ تے شیلڈز ݙتن۔