اسلام آباد۔19جولائی (اے پی پی) وزیراعظم محمد شہباز شریف آکھیا جو ابوظہبی پورٹس نال معاہدہ نال ہر قسم دا تعاون کر تے ایں توں فیدہ چاتا ویسی۔ ڈیجیٹل ٹیکنالوجی اتے جدید مشینری نال بندرگاہ تے سامان تے کنٹینرز دے انتظام کوں بہتر کیتا ویسی۔ جمعے کوں وزیراعظم آفس دے میڈیا ونگ توں جاری پریس ریلیز موجب وزیراعظم محمد شہباز شریف نال ابوظہبی پورٹس پاکستان دے چیف ایگزیکٹیو آفیسر خرم عزیز خان وفد دے رلے ملاقات کیتی۔ ایں موقع تے وزیراعظم کوں بریفنگ ݙیندیں ہوئیں ݙسیا جو ابوظہبی پورٹس پاکستان کراچی بندرگاہ اچ آندے ݙاہ سالیں اچ 250 ملین ڈالر دی سرمایہ کاری کریسی۔ 130 ملین ڈالردی سرمایہ کاری نال ٻݨݨ آلا جدید اتے ساری ضروری سہولتاں نال لیس کثیر المقاصد ٹرمینل آندے ݙو سالیں اچ مکمل تھی ویسی۔ وفد وزیراعظم کوں کراچی بندرگاہ تے کنٹینر ٹرمینل دی سہولتاں اچ بہتری کیتے کمپنی دی سرمایہ کاری تے تفصیلی بریفنگ ݙیندیں ہوئیں ݙسیا جو کنٹینر ٹرمینل دے منصوبے اچ ایکسس کنٹرول، خودکار گیٹس، برتھ اچ مزید 200 میٹر دی توسیع، کرین ریل ٹریک اتے ٻیا انفراسٹرکچر دی تعمیر شامل اے، ٹرمینل تے نویں انفراسٹرکچر دی تعمیر نال ہک لکھ 20 ہزار ٹن تئیں مال بردار جہاز لنگر انداز تھی سڳسن۔ وزیراعظم ہدایت کیتی جو کنٹینرز دے نظام کوں بہتر کر تے کلیئرنس کیتے ویلھا ڳھٹایا ونڄے۔ ابوظہبی پورٹس نال معاہدہ نال ہر قسم دا تعاون کر تے ایں توں فیدہ چاتا ویسی۔وزیراعظم ریلوے حکام کوں منصوبے کوں فعال اتے ٹرمینل توں سامان ٻھیجݨ کیتے مال بردار بوگیاں اتے ضروری رولنگ سٹاک ݙیوݨ دی ہدایت کیتی۔