امن اتے معیشت تے سیاست نی تھیوݨی چاہیدی، امن کیتے ساریاں کوں رَل تے کم کرݨا پوسی، پی ٹی آئی تے پابندی دے معاملے تے اتحادیاں نال مشورہ جاری اے، انجینئر امیر مقام دی پریس کانفرنس

اسلام آباد۔22جولائی  (اے پی پی) وفاقی وزیر امور کشمیر تے گلگت بلتستان و سیفران انجینئر امیر مقام آکھیا جو امن اتے معیشت تے سیاست نی تھیوݨی چاہیدی، امن کیتے ساریاں کوں رَل تے کم کرݨا پوسی، پی ٹی آئی تے پابندی دے معاملے تے اتحادیاں نال مشورہ جاری اے۔ وزیراعظم بنوں واقعے تے تحقیقات کیتے جے آئی ٹی ٻݨاون۔ جرمنی واقعے اچ ملوث پاکستانیاں اتے افغانیاں دا تصادم چاہندن، سکیورٹی ادارے سرحداں دے دفاع دے نال نال ملک دے اندر دہشت گردی اتے بد امنی دے خلاف فعال ہن۔ سنوار کوں پریس کانفرنس اچ انہاں آکھیا جو جرمنی اچ پاکستان دے جھنڈے دی بے حرمتی کیتی ڳئی اے جئیں دی مذمت کریندوں خواہ ایندے اچ ملوث شرپسنداں دا تعلق پاکستان دے اندر توں ہووے یا افغانستان توں ہووے۔ اساں افغان پناہ گزیناں دی 44 سال میزبانی کیتی اے اتے انہاں دے وݙیاں کوں ایندا احساس وی اے۔ ہݨ وی انہاں کوں ہک ہفتے پہلے ہک سال رہݨ دی توسیع ݙتی ڳئی اے۔ وزارت داخلہ اتے خارجہ افغانیاں اتے پاکستانیاں کوں لڑاوݨ دی ناکام سازش کرݨ آلیاں دی نشاندہی کیتے کم کریندی پئی اے۔ اے خارج از امکان نی جو ایندے اچ او ملوث ہوون جیڑھے شرپسندی، نو مئی، سائفر بیانیہ، سازش دی ڳالھ اتے کانگریس توں پاکستان دے خلاف قرارداد منظور کراوݨ آلے ہن۔ اے ڳالھ تحقیقات نال نشابر تھی ویسی۔ اساں جرمن حکومت توں وی مطالبہ کریندوں جو ایندے اچ ملوث لوکاں دے خلاف کاروائی کرے۔ انہاں آکھیا جو بنوں اچ تاجراں دے احتجاج اچ آپݨے لوکاں کوں شامل کرݨ اتے ہک ادارے کوں ٹارگٹ کرݨ او کم پورا کرݨ ہئی جیڑھا نو مئی کوں نی تھی سڳیا۔ انہاں آکھیا جو جینویں نو مئی کوں فوجی تنصیبات تے حملہ کیتا ڳئیا، ٹول پلازے ساڑیے ڳئے ، اڄ ولا اوہو کم شروع اے۔ پر امن احتجاج اچ اسلحہ کینویں آیا، صوبائی حکومت ایندے اچ ملوث اے۔ وزیراعظم ایندی تحقیقات کیتے جے آئی ٹی ٻݨاوݨ جئیں اچ ہر ادارے توں لوک شامل ہن تانجو ایں سازش کوں بے نقاب کیتا ونڄے۔ ہک سوال دے ولدے اچ انہاں آکھیا جو آزادی اظہار رائے دا مقصد ملک اچ عدم استحکام کھنڈاوݨ نئی۔ انہاں آکھیا جو شہباز شریف ݙینھ رات کم کریندے پئن اونویں آرمی چیف وی ملکی معیشت کیتے کم کریندے پئن۔