حکومت بجلی دے ٻلاں اچ لوکاں کوں سوکھ ݙیوݨ سانڳے کمیٹی بݨا ݙتی اے، رانا تنویر حسین

اسلام آباد۔24جولائی (اے پی پی) وزیر صنعت و پیداوار رانا تنویر حسین آکھیے حکومت بجلی دے ٻلاں اچ لوکاں کوں سوکھ ݙیوݨ سانڳے کمیٹی بݨا ݙتی اے ، ترقیاتی بجٹ توں 50 ارب روپے دی کٹوتی 200 یونٹ تئیں دے صارفین کوں ریلیف ݙیوݨ سانڳے کیتی اے۔ اے ڳالھ انہاں اسلام آباد اچ میڈیا نال الیندے ہوئیں آکھی اے۔وزیر صنعت و پیداوار رانا تنویر حسین آکھیے جو صنعتاں کوں وی 10 روپے فی یونٹ دا ریلیف ݙتا ڳئے ،عوام کوں بجلی دے ٻلاں اچ ریلیف ملسی بھل ایندے اچ کجھ ویلھا لڳسی ، انہاں آکھیے آئی پی پیز نال معاہدیں تے ڳالھ مہاڑ تھیندی پئی اے ، گیس اتے ٻئی توانائی تے چلݨ آلے منصوبیں کوں کولیں تے منتقل کرݨ سانڳے ڳالھ وی چلدی پئی اے ، ایں سانڳے وزیراعظم چینی صدر نال وی ڳالھ کیتی ہئی ، بجلی گھراں دے کولیں تے منتقل تھیوݨ پاروں پیداواری لاڳت گھٹ تھیسی ، اڄ کابینہ دے اجلاس اچ پی ٹی آئی اتے بانی پی ٹی آئی دے حوالے نال غور نی تھیا۔انہاں آکھیا جو آخر بانی پی ٹی آئی وی من ڳھدے جو انہاں کارکناں کوں جی ایچ کیو بھیڄا ھا، ہݨ او آہدن جو میں تاں اے آکھیا ہم جی ایچ کیو دے اڳوں پر امن احتجاج کرو، بانی پی ٹی آئی جیویں کارکناں دی ذہن سازی کیتی ہئی او ہر کہیں دے سامݨے ہے