اخباری صنعت دے 1.6 ارب روپے ݙے ݙتن، کہیں وی چینل دے اشتہارات بند نئیں کیتے ڳئے، وفاقی وزیر اطلاعات دی قومی اسمبلی دی قائمہ کمیٹی اطلاعات کوں بریفنگ

اسلام آباد۔25جولائی  (اے پی پی):وفاقی وزیر اطلاعات، نشریات، قومی ورثہ و ثقافت عطاءاللہ تارڑ اخباری صنعت دے 1.6 ارب روپے ݙے ݙتن، کہیں وی چینل دے اشتہارات بند نئیں کیتے ڳئے۔ اے ڳالھ انہاں قومی اسمبلی دی قائمہ کمیٹی برائے اطلاعات و نشریات دے اجلاس اچ بریفنگ ݙیندے آکھی۔ انہاں آکھیا جو وزارت نجی میڈیا دے واجبات ݙے ݙتن جیندے نال میڈیا ورکرز کوں تنخواہواں ݙیوݨ اچ سکھ ملیے، ملک اچ ڈمی اخبارات وݙا مسلہ ہین، کوشش اے جو صرف تصدیق شدہ اخبارات کوں ہی اشتہارات جاری کیتے ویسن، اساں بجٹ اچ نیوز پرنٹ تے 10 فیصد ٹیکس لاوݨ دی تجویز مستر کرݙتی، جیکر اے ٹیکس لڳ ویندا تاں اخبارات ودھ معاشی اوکھ دا شکار ہوندے، اساں اخباری صنعت کؤں ودھ سکھ ݙیسوں۔ انہاں آکھیا جو وزارت دے ذیلی ادارے بہترین کم کریندے پن، پی ٹی وی دی تنظیم نو کیتے مختلف انتظامی اقدامات کیتے ویندے پن، ہر کہیں کؤں برابر کوریج کیتے ادارتی پالیسی تے نظر ثانی کیتی اے، پی ٹی وی دی آمدن ودھائی اے، پی ٹی وی سپورٹس دا ریونیو ڈبل کرݙکھائے، پی ٹی وی اچ تفریح کوں پبلک پرائیویٹ پارٹنر شپ اچ ڳھن آیا ویسی۔ انہان ارکان دے مختلف سوالاں دا ولدا وی ݙتے۔ انہاں اکھیا جو الیکٹرانک میڈیا ورکرز کوں ویج بورڈ ایوارڈ دے دائرہ کار اچ ڳھن آوݨ کیتے نیوز پیپرز ایمپلائز (کنڈیشنز آف سروس) ایکٹ 1973 اچ ترامیم سودھا شالیمار ریکارڈنگ کمپنی دی نجکاری تے غور کیتا ویندا پئے۔ اجلاس اچ ایگزیکٹو ڈائریکٹر جنرل و پی آئی او مبشر حسن پی آئی ڈی بارے بریفنگ ݙتی۔ اجلاس اچ پی آئی او مبشر حسن دے ابا سئین دی فوتڳی تے فاتحہ وی کیتی ڳئی۔ کمیٹی پی ٹی وی دے امور بارے تفصیل پیش کرݨ دی ہدایت کریندے حکومت دی اشتہارات پالیسی اتے الیکٹرانک و پرنٹ میڈیا تے پبلک سیکٹر دے اشتہارات ݙیوݨ دی بنیاد تے خصوصی بریفنگ ڳھنݨ دا وی فیصلہ کیتے اتے وزارت اطلاعات دے تحت میڈیا اداراں دے مستقل سربراہان دی تقرری کیتے باقاعدہ عمل شروع کرݨ دی وی ہدایت کیتی۔ اجلاس اچ وزیر اطلاعات و نشریات عطاءاللہ تارڑ، اراکین کمیٹی محمد حنیف عباسی، ندیم عباس، کرن عمران ڈار، آسیہ ناز تنولی، مہتاب اکبر راشدی، سحر کامران، سید امین الحق، محمد مقداد علی خان، عمر فاروق، وقاص اکرم شیخ، رانا محمد فراز نون، محمد معظم علی خان، سیکرٹری وزارت اطلاعات و نشریات، ایڈیشنل سیکرٹری وزارت اطلاعات و نشریات، پی آئی او، پی آئی ڈی، ڈی جی پی بی سی اتے متعلقہ محکمیاں دے افسران شرکت کیتی۔