حکومتی ٹیم اتے جماعت اسلامی دے مذاکرات شروع تھی ڳئن، جماعت اسلامی دے رہنماواں نال رل ٻہہ تے ڳالھ کریسوں ، انہاں دے تحفظات مکیسوں، وفاقی وزیر اطلاعات ونشریات عطاءاللہ تارڑ

راولپنڈی۔28جولائی(اے پی پی) حکومتی ٹیم اتے جماعت اسلامی وچال مذاکرات شروع تھی ڳئن ۔ حکومتی مذاکراتی ٹیم اچ وفاقی وزیر اطلاعات عطاءاللہ تارڑ، وفاقی وزیر امور کشمیر انجینئر امیر مقام، مسلم لیگ (ن) دے سینئر رہنما طارق فضل چوہدری، وزیراعظم دے میڈیا کوآرڈینیٹر بدر شہباز شامل ہن جݙاں جو جماعت اسلامی دے وفد دی قیادت لیاقت بلوچ کریندے پئن۔ ایندے توں پہلے کمشنر آفس راولپنڈی آمد دے موقع تے میڈیا نال ڳالھ کریندے وفاقی وزیر اطلاعات عطاءاللہ تارڑ آکھیے جماعت اسلامی دے رہنماواں نال مذاکرات دے بعد ساریاں چیزاں دا ݙسایا ویسی ساݙی طرفوں مذاکراتی ٹیم اچ کوئی تبدیلی نی کیتی ڳئی ، اویس لغاری ملک اچ موجود کائنی ، او چین ڳئے ہوئن ۔ انہاں آکھیے جماعت اسلامی دے رہنماواں نال رل ٻہہ تے ڳالھ کریسوں ، جماعت اسلامی دے بجلی متعلق معاملات ہن، انھاں دے تحفظات مکیسوں ۔ انہاں آکھیے 200 یونٹ استعمال کرݨ آلے بجلی صارفین کوں پہلے ہی 50 ارب روپے دی سبسڈی ݙتی ڳئی اے ، حکومت سولر پراجیکٹس وی شروع کریندی پئی اے ڈیزل اتے تیل تے چلݨ آلے پلانٹس کوں بند کیتا ویسی ، سولر ٹیوب ویل لاوݨ نال بجلی دی کھپت گھٹ ویسی انہاں اقدامات دا مقصد سستی اتے معیاری بجلی بݨا تے بجلی دیاں قیمتاں گھٹ کرݨیاں ہن