اسلام آباد۔30جولائی (اے پی پی) اسلام آباد ہائیکورٹ قومی خبر رساں ادارے ’’اے پی پی‘‘ اچ کروڑاں روپے مالیت دے کرپشن کیس اچ دی ضمانت قبل از گرفتاری دی درخواستاں خارج کر ݙتی اتے وفاقی تحقیقاتی ادارے(ایف آئی اے ) ترائیں ملزماں ، اوں ویلھے دے پراجیکٹ ڈائریکٹر محمد غواث خان ، مصور عمران (ڈپٹی ڈائریکٹر )اتے سعدمدثر ( سابق چیف کمپیوٹر انجینئر) کوں گرفتار کر ڳھدے۔ منگل کوں عدالت عالیہ دے جسٹس طارق محمود جہانگیری ملزماں ولوں دائر درخواست ضمانت قبل از گرفتاری دی سݨیڄ کیتی۔
ایں موقع تے اے پی پی دے لیگل ایڈوائزر سنئیر قانون دان سردار یعقوب مستوئی ایڈوکیٹ عدالت اچ پیش تھیے جڈانجو ایف آئی اے ولوں اسسٹنٹ ڈائریکٹر شاہد پرویز ملک پیش تھیے۔ سردار یعقوب مستوئی ایڈوکیٹ آکھیا جو ماتحت عدالتاں ملزماں دی ضمانتاں منسوخ کیتی ہن جڈانجو ملزم فرار تھی ڳئے ہن۔ ملزماں کرپشن نال قومی خبررساں ادارے دا کروڑاں دا نقصان کیتے ایں کیتے ملزماں دی ضمانت منسوخ کیتی ونڄے۔ عدالت ملزماں دی درخواست ضمانت خارج کرݨ دا حکم جاری کر ݙتا۔ ایف آئی اے ضمانت منسوخی دے بعد ملزمان غواث خان ،سعد مدثر اتے مصور عمران کوں گرفتار کر ڳھدا۔
واضح راہوے جو ایف آئی اے ترائیں ملزماں سودھے بلال ظفر (ڈپٹی ڈائریکٹر سائبر ونگ وزارت اطلاعات)، ارشد مجید چوہدری(سابق منیجر اکائونٹس)، ضیاء اللہ بھٹو ( اوں ویلھے دے ڈائریکٹر ایڈمن اینڈ پی اینڈ ڈی)، میسرز تیجاری پاکستان پرائیویٹ لمیٹڈ، میسرز نیو ہورائیزن، میسرز آرٹیک سسٹم، میسرز میڈیا لنکس دے عہدیداران شامل ہن، دے خلاف سیکشن 34.409 ، 420، 468، 471 ، PPC r/w 5(2) 47 PCA دے تحت مقدمہ درج کیتا ہئی۔ ترجمان ایف آئی اے دے جاری تھیے بیان موجب اینٹی کرپشن سرکل اسلام آباد کاروائی کریندیں ہوئیں کرپشن ، بدعنوانی ، فراڈ ، مجرمانہ غفلت اتے اختیارات دا ناجائز استعمال کرݨ اچ ملوث ترائے سرکاری اہلکاراں محمد غواث، سعد مدثر اتے مصور عمران کوں گرفتار کر ڳھدے۔
ابتدائی تفتیش موجب ملزماں کرپشن کریندیں ہوئیں قومی خزانے کوں 124 ملین روپے دا ضیان ݙتے۔ ترجمان موجب ایسوسی ایٹڈ پریس کارپوریشن آف پاکستان دی پروکیورمنٹ کمیٹی دا حصہ ہن۔ ملزماں ملی بھگت، دھوکہ اتے اختیارات توں ودھ تے آرٹیک سسٹم نامی فرم کوں 113 ملین دا کنٹریکٹ ݙتا ،ایں فرم دا فنانشل پروپوزل مجاز اتھارٹی توں منظور کائنا ہئی۔ ملزماں اے جی پی آر توں بل منظور کراوݨ دے پروکیورمنٹ کمیٹی دےخود جعلی میٹنگ منٹس ٻݨائے۔ ایں منصوبے دی کل لاگت 786.79 ملین روپے ہئی۔ اے ڳالھ قابل غور اے جو ایف آئی اے دے اینٹی کرپشن سرکل اسلام آباد دے ڈپٹی ڈائریکٹر محمد افضل نیازی دی سربراہی اچ ایف آئی اے ٹیم ایں بدعنوانی کیس میرٹ اتے شفافیت نال ٹھوس ثبوت جمع کیتے اتے نہایت جانفشانی نال انکوائری پوری کیتی۔ ترجمان ایف آئی اے موجب ملزماں کوں گرفتار کر تے تفتیش شروع کر ݙتی ڳئی اے۔
