حکومت اقدامات پاروں کلی معیشت دے استحکام یقینی ٻݨاوݨ اچ مدد ملی اے، زرعی پیداوار، برآمدات اتے ترسیلات زر ودھݨ دا رجحان اونویں رہسی، وزارت خزانہ

اسلام آباد۔30جولائی  (اے پی پی) وزارت خزانہ آکھیا جو حکومت اقدامات پاروں کلی معیشت دے استحکام یقینی ٻݨاوݨ اچ مدد ملی اے، زرعی پیداوار، برآمدات اتے ترسیلات زر ودھݨ دا رجحان اونویں رہسی۔ وݙی صنعتاں دی پیداوار اچ ودھارے اتے افراط زر دی شرح اچ ڳھٹکی نال معیشت دی بہتری تھیندی پئی اے۔ وزارت خزانہ ولوں جاری کردہ ماہانہ اقتصادی اپ ڈیٹ موجب مالی سال 2024ء وچال پاکستان دی معیشت استحکام آلے پاسے ویندی پئی اے۔ افراط زر دی شرح اچ نشابر ڳھٹکی تھئی اے، گزریل مالی سال دے پہلے 11 مہینے اچ حسابات جاریہ دے خسارے اچ ڳھٹکی تھئی اے۔ زرعی شعبہ بہترین کارکردگی ݙکھائی اے۔ رہورٹ موجب مالی سال 2024ء اچ زرعی ٹریکٹراں دی پیداوار اچ 43.5 فیصد دی شرح نال نمو ریکارڈ کیتی ڳئی اے۔ زرعی قرضیاں دا حجم 1972.8 ارب روپے ریکارڈ کیتا ڳئے جیڑھا جو گزریل مالی سال دے مقابلے اچ چھوی فیصد ودھ اے۔ پنجاب اچ 1.304 ملین ہیکٹر رقبے تے کپاہ دی کاشت ریکارڈ کیتی ڳئی اے جڈانجو ہدف 1.680  ملین ہیکٹر ہئی، سندھ اچ 0.550 ملین ہیکٹر اراضی تے کپاہ کاشت کیتی ڳئی اے جڈنجو ہدف 0.630 ملین ہیکٹر ہئی۔ موسم خریف اچ کھاداں دی کھپت دا حجم 1210 ہزار ٹن ہئی جیڑھا جو گزریل خریف دے مقابلے 18.1 فیصد ڳھٹ اے۔  ڈی اے پی دی کھپت دا حجم 256 ہزار ٹن ریکارڈ ریکارڈ کیتا ڳئے جیڑھا گزریل سیزن دے مقابلے اچ 6.8 فیصد ڳھٹ اے۔ مئی اچ وݙی صنعتاں دی پیداوار اچ سالانہ بنیاداں تے 7.3 فیصد اتے ماہانہ بنیاداں تے 7.5 فیصد ودھارا تھیے۔ سیمنٹ دی کھپت اچ 1.6 فیصد دا ودھارا تھیے اتے مجموعی طور 45.3 ملین ٹن سیمنٹ دی کھپت ریکارڈ کیتی ڳئی اے۔ مقامی کھپت دا حجم 38.2 ملین ٹن ریکارڈ کیتا ڳئے جیڑھا جو گزریل سال دے مقابلے 4.6 فیصد ڳھٹ اے۔ رپورٹ موجب جون اچ صارفین کیتے نرخاں دا عمومی اشاریہ 12.6 فیصد ریکارڈ کیتا ڳئے جیڑھا جو مئی اچ 11.8 فیصد اتے گزریل سال جون اچ 29.4 فیصد ہئی۔ اوسط سالانہ افراط زر 29.2 فیصد توں ڳھٹ تے 23.4 فیصد دی سطح تے آئی اے۔  پرائمری بیلنس دا حجم 1620.5 فیصد ارب روپے ریکارڈ کیتا ڳئے جیڑھا جو جی ڈی پی دا 1.5 فیصد ٻݨدے۔ گزریل مالی سال دے پہلے 11 مہینے اچ مجموعی وفاقی محاصل دا حجم 6202.6 ارب روپے ریکارڈ کیتا ڳئے جیڑھا جو 49 فیصد ودھ اے۔۔ براہ راست ٹیکساں اچ 38.5 فیصد جڈانجو سیلز ٹیکس، فیڈرل ایکسائز ڈیوٹی اتے کسٹم ڈیوٹی اچ بالترتیب 19.6 فیصد، 56.1 فیصد اتے 18.5 فیصد دی شرح نال نمو ریکارڈ کیتی ڳئی اے۔ وزارت خزانہ موجب برآمدات اتے ترسیلات زر اچ ودھارے پاروں مالی سال 2024ء اچ حسابات جاریہ دے کھاتیاں دا خسارہ 0.7 ارب ڈالر تئیں محدود کیتا ڳئے جیڑھا جو مالی سال 2023ء اچ 3.3 ارب ڈالر ہئی۔ درآمدات دا حجم 53.2 ارب ڈالر ریکارڈ کیتا ڳئے جیڑھا جو مالی سال 2023 اچ 52.3 ارب ڈالر ہئی۔ مجموعی تجارتی خسارہ دا حجم 22.1 ارب ڈالر ریکارڈ کیتا ڳئے جیڑھا جو گزریل سال اچ 24.8 ارب ڈالر ہئی۔ گزریل مالی سال اچ براہ راست ٻاہرلی سرمایہ کاری دا حجم 1.9 ارب ڈالر ہئی جیڑھا جو گزریل مالی دے مقابلے 16.9 فیصد ودھ اے۔  تیل تے گیس دے شعبہ اچ 303.6 ملین ڈالر دی براہ راست بیرونی سرمایہ کاری ریکارڈ کیتی ڳئی اے۔ گزریل مالی سال اچ سمندرپارپاکستانیاں دی ترسیلات دا حجم 30.3 ارب ڈالر ریکارڈ کیتا ڳئے جیڑھا جو مالی سال 2023 دے مقابلے 10.7 فیصد ودھ اے۔ زرمبادلہ دے ملکی ذخائر دا حجم 12 جولائی کوں 14.7 ارب ڈالر ریکارڈ کیتا ڳئے ڄئیں اچ سٹیٹ بینک دے زرمبادلہ دا حجم 9.4 ارب ڈالر ہئی۔ اقتصادی اپ ڈیٹ موجب مالی سال 2024ء اچ زر وسیع (ایم 2) اچ 15.5 فیصد دی شرح نال نمو ریکارڈ کیتی ڳئی اے۔ وزارت خزانہ موجب گزریل سال ستمبر توں پاکستان سٹاک ایکسچینج دی کارکردگی بہتر رہی اے۔  مئی 2024ء اچ تخفیف غربت فنڈ 24 شراکت دار اداریاں دے تعاون نال 28 ہزار 913 بلاسود قرضے ݙتے جئیں دا حجم 1.38 ارب روپے ہئی۔ فروری 2023 توں مارچ 2024 تئیں حکومت ہک لکھ 40 ہزار 202 مستحقین اچ 83.68 ارب روپے دے قرضے تقسیم کیتن۔ اے قرضے وزیراعظم یوتھ بزنس اینڈ ایگریکلچر لون سکیم دے تحت ݙتے ڳئن۔  وزارت خزانہ موجب جولائی اچ افراط زر دی شرح 12 توں ڳھن تے 13 فیصد اتے اگست اچ 11 توں 12 فیصد رہݨ دا امکان اے۔ اینویں ماہانہ برآمدات دا حجم 2.4 توں 2.7 ارب ڈالر اتے درآمدات دا حجم 4.5 توں 4.9 ارب ڈالر رہݨ دا امکان اے۔