اسلام آباد۔8اگست(اے پی پی) نائب وزیر اعظم تے وزیر خارجہ سینیٹر محمد اسحاق ڈار آسیان ڈے دے موقع تے پاکستان دی حکومت اتے عوام دی طرفوں تنظیم دے رکن ملک دیاں حکومتاں تے عوام کوں مبارخ ݙیندے انہاں سانڳے نیک خواہشات دا اظہار کیتے۔ دفتر خارجہ موجب جاری سنھیے اچ نائب وزیراعظم آکھیے ایں موقع تے سیکرٹری جنرل ڈاکٹر کاؤ کم ہورن کوں انہاں دی مثالی قیادت اتے آسیان ایجنڈے کوں اڳوں ودھاوݨ اچ انتھک کوششاں تے مبارخ ݙیوݨ چاہنداں ۔ اے ݙینھ جنوب مشرقی ایشیائی ملکاں وچال اتحاد تے تعاون دے پائیدار جذبے دی علامت اے، آسیان دے دوستاں نال رل تے ایں سنگ میل کوں مناوݨ ھک اعزاز دی ڳالھ اے ۔ سینیٹر محمد اسحاق ڈارآکھیے جنوب مشرقی ایشیائی ملکاں دی ایسوسی ایشن (آسیان)علاقائی انضمام اتے اجتماعی پیشرفت دے نمونے دے طور تے کھڑی اے جیڑھے اقتصادی ترقی، سماجی ہم آہنگی اتے سفارتی مشغولیت اچ نمایاں کامیابیاں دا مظہر اے۔ پاکستان ایشیا پیسفک خطے اچ امن، استحکام اتے خوشحالی ودھاوݨ اچ آسیان دے اہم کردار دا احترام کریندے ، آسیان ڈے نہ صرف اساکوں علاقائی تعاون دی اہم اہمیت دی یاد ݙویندے بلکہ خطے دے بھرپور ثقافتی تنوع اتے تاریخی ورثے کوں وی اجاگر کریندے۔ نائب وزیراعظم آکھیے آسیان نال پاکستان دے تعلقات سانجھے احترام، عدم مداخلت اتے تعمیری مشغولیت دے اصولاں سانڳے مشترکہ عزم تے ہن ، اساں آسیان دے ڈائیلاگ میکانزم اچ ھک فعال پارٹنر رہیے سے تے تجارت ، سرمایہ کاری، تعلیم، ثقافت اتے عوامی وفد دے تبادلے جیہے شعبیں اچ آپݨے تعاون کوں مزید گھاٹا کرݨ دی کوشش اے ۔آسیان نال ساݙا تعاون آسیان علاقائی فورم (اے آر ایف) اچ ساݙی فعال شرکت دے ذریعے مزید تکڑا تھئے، پاکستان ھک پرامن، مستحکم اتے خوشحال خطے دی ڳول اچ آسیان نال اپݨی شراکت داری ودھاوݨ دی آپݨی خواہش دا اعادہ کریندے ۔آؤ ایں موقع کوں اپݨی مشترکہ کامیابی تے غور کرݨ تے آسیان دے مشن دی رہنمائی کرݨ آلے اصولاں سانڳے آپݨی وابستگی دی تجدید کروں۔ نائب وزیر اعظم آکھیے پاکستان آسیان دے وژن دی حمایت اچ ثابت قدم اے تے ایندی جاری کامیابی اچ آپݨا حصہ پاوݨ دا منتظر اے
