دبئی۔8اگست(اے پی پی) متحدہ عرب امارات پاکستان دے 77ویں یوم آزادی تے 11 اگست کوں دبئی اچ شاندار تقریب کراوݨ دا اعلان کیتے ۔ متحدہ عرب امارات دی نیوز ایجنسی وام موجب اے تقریب دبئی ورلڈ ٹریڈ سینٹراچ تھیسی جیں اچ تقریباً ݙاہ ہزار لوک شرکت کریسن ۔ تقریب اچ متحدہ عرب امارات دے وزیر رواداری و بقائے باہمی شیخ نہیان بن مبارک النہیان اتے متحدہ عرب امارات اچ پاکستان دے سفیر فیصل نیاز ترمذی نال پاکستانی کمیونٹی دے نمائندے تے اہم شخصیات شرکت کریسن۔ تقریب ’’امارات پاکستان نال محبت کریندے ‘‘دے پیج دے اہتمام نال تھیسی ۔ رپورٹ موجب پاکستان ایسوسی ایشن دبئی، دبئی پولیس اتے دبئی ورلڈ ٹریڈ سینٹر دے تعاون نال اے تقریب متحدہ عرب امارات تے پاکستان وچال پراݨی یاری تے گھاٹے تعلقات کوں نشابر کریندی اے ۔نیڑے ثقافتی پرفارمنس، میوزیکل شوز، اتےروایتی سرگرمیاں شامل ہوسن جیڑھے متحدہ عرب امارات دی ترقی اچ پاکستانی کمیونٹی دے بھرپور ورثے اتے شراکت دی عکاسی کریسن۔اے تقریب متحدہ عرب امارات دے بین الاقوامی تعاون اتے رواداری دے ودھارے تے ہم آہنگی دا ماحول بݨاوݨ دیاں کوششاں دا حصہ اے تاں جو اتھاں مختلف ثقافتاں نال تعلق رکھݨ آلے پرامن طریقے نال کٹھے رہ سڳن ۔ متحدہ عرب امارات تے پاکستان وچال پراݨے تعلقات ہن، جنھاں دی بنیاد امارات دے بانی رہنما شیخ زاید بن سلطان النہیان مرحوم 1971 اچ رکھی ہئی۔اڄ ݙوہیں بھرا مسلم ملکاں دے سانجھے تعلقات پہلے توں کتھائیں ودھ تکڑے ہن جنھاں کوں اسٹریٹجک شراکت داری اتے ودھدے اقتصادی تعاون نال ودھدے پئن ۔ متحدہ عرب امارات پاکستان دا ساریں توں وݙا تجارتی شراکت دار تے ساریں توں وݙا سرمایہ کار اے، جیں ہݨے ہی پاکستان دے معاشی شعبیں اچ 10 ارب ڈالر دی سرمایہ کاری دا وعدہ کیتے
