پاکستان ترکیہ نال اقتصادی تعلقات اتے ݙوطرفہ تجارت ودھاوݨ چاہندے، وزیر تجارت جام کمال خان

اسلام آباد۔9 اگست(اے پی پی)وفاقی وزیر تجارت جام کمال خان آکھیے جو پاکستان ترکیہ نال اقتصادی تعلقات اتے ݙوطرفہ تجارت ودھاوݨ چاہندے، وزیراعظم شہباز شریف دی اڳواݨی اچ حکومت تجارتی شراکت داراں نال تجارتی حجم ودھاوݨ اتے نویاں منڈیاں ڳولݨ تے توجہ ݙیندی پئی اے۔ انہاں اے ڳالھ کراچی اچ بین الاقوامی خوراک و زراعت نمائش 2024 اچ شرکت کیتے پاکستان پڄݨ تے ترکیہ دے وزیر تجارت پروفیسر ڈاکٹر عمر بولات دی اڳواݨی اچ ترک وفد کیتے ݙتے ڳئے ناشتے نال خطاب کریندے پئے ہن۔ کراچی اچ ترکیہ دے کونسل جنرل سیمل سانگو، ترکیہ اچ پاکستان دے سفیر ڈاکٹر یوسف جنید، چیف ایگزیکٹو ٹریڈ ڈویلپمنٹ اتھارٹی آف پاکستان زبیر موتی والا، ایف پی سی سی آئی، کے سی سی آئی اتے ٻئے تجارتی اداریاں دے نمائنداں دے علاوہ ٻئے حکام اجلاس اچ شرکت کیتی۔ وزیر تجارت پاکستان اچ زراعت، خوراک و زرعی مصنوعات اچ تجارت اتے سرمایہ کاری دے مواقع دا ݙسایا۔ انہاں آکھیا جو حکومت زرعی پیداوار ودھاوݨ، کاروباری رابطیاں اتے وفداں دے تبادلے دی حوصلہ افزائی کریندی پئی اے، ایں سانڳے ترک کمپنیاں فیدہ چا سڳدن۔ ترکیہ دے وزیر تجارت عمر بولات پاکستان نال مختلف شعبیاں، اقتصادی و تجارتی تعلقات ودھاوݨ سانڳے دلچسپی ݙکھیندے آکھیے جو کاروباری، صنعت، برآمد کنندگان اتے سرمایہ کاراں دا وفد بزنس ٹو بزنس میٹنگز، روڈ شوز اتے کاروباری فورمز نال الاوݨ کیتے آئے۔