10 لکھ طلباء کوں ٹیبلٹس، سمارٹ فون ݙیسوں، 3 لکھ نینگراں کوں آئی ٹی دی تربیت، ہک ہزار زرعی گریجویٹس کوں سکالرشپ تے چین ٻھڄیا ویسی، وزیراعظم محمد شہباز شریف

اسلام آباد۔12اگست(اے پی پی)وزیراعظم محمد شہباز شریف آکھیے جو نینگراں کوں وسائل ݙیوݨ نال ملکی ترقی و خوشحالی دا خواب پورا تھیسی، 10 لکھ طلباء کوں ٹیبلٹس اتے سمارٹ فون ݙیسوں، 3 لکھ نینگراں کوں آئی ٹی دی تربیت، ہک ہزار زرعی گریجویٹس کوں سکالرشپ تے چین ٻھڄیا ویسی۔ اے ڳالھ انہاں عالمی یوم نوجوانان تے پرائم منسٹر یوتھ پروگرام ولوں تقریب نال خطاب اچ آکھی۔ انہاں دولت مشترکہ ایشیاء یوتھ الائنس دے سیکرٹریٹ، ڈیجیٹل لرننگ پورٹل، گرین یوتھ موومنٹ، اے آئی فار یوتھ اتے قومی رضاکار کور دے اجراء دا وی افتتاح کیتے۔

وزیراعظم آکھیا جو نینگراں دا عالمی ݙینھ منیندے پئے ہیں اتے 14 اگست وی آیا کھڑے، پہلے پنجاب دے نینگراں دی خدمت کیتی ہئی ہݨ پورے پاکستان دے نینگراں کوں بااختیار ٻݨاوݨ کیتے خادم ٻݨ تے خدمت کریساں جو نوجوان ہی ملک دی قسمت وٹا صڳدن ڄیکوں جدید دور دے مطابق تعلیم ݙتی ویسی، ڄیکر اساں جدید علوم سانڳے نینگراں کوں ودھ وسائل ݙیوں تاں ملک اچ اے نوجوان نسل خوشحالی دا اینڄھا انقلاب ڳھن آسی جو آزادی دا مقصد ہی پورا تھی ویسی، اساں قائد دی سوچ دے مطابق انہاں دے خواب کوں تعبیر ݙیوݨی اے۔

وزیر اعظم آکھیا جو پاکستان اچ وسائل دی کوئی کمی کائنی، 77 سالاں اچ قرض دے پہاڑ ٻݨ ڳن، صوبے اچ نوجواناں کیتے پروگرام چلیندے پئے ہیں، ہواوے نال رل تے نینگراں کون جدید تعلیم و تربیت ݙتی ویسی اتے ایس ایم ایز دے ذریعے روزگار دے مواقع، سوکھیاں شرطاں تے قرضے ݙتے ویسن، پاکستان دی اقتصادی بحالی اتے ترقی و خوشحالی دے منصوبے دا تیکھے اعلان کریساں۔ انہاں کھیݙاں خاص کر قومی کھیݙ ہاکی دی بحالی دا عزم دوہریندے آکھیے جو ارشد ندیم دی کامیابی محنت اتے عزم دی مثال اے۔ تقریب اچ وزیراعظم محمد شہباز شریف آن لائن رجسٹریشن کرا تے قومی رضاکار کور دے رکݨ ٻݨ گئن اتے انہاں کوں قومی رضاکار کور دا بیج لایا ڳئے۔

وزیراعظم بہترین صلاحیتاں ݙکھاوݨ آلے نوجواناں کوں یوتھ ایوارڈز وی ݙتن۔