ملک اچ مقامی طور امریکی کاروباری اداریاں ولوں ماحولیاتی تغیرات دے خاتمے کوں سنجیدگی نال ڳھنݨ چنڳی ڳالھ اے، رومینہ خورشید عالم

اسلام آباد۔13اگست  (اے پی پی) وزیر اعظم دی کوآرڈینیٹر برائے ماحولیاتی تبدیلی رومینہ خورشید عالم آکھیا جو ملک اچ مقامی طور امریکی کاروباری اداریاں ولوں ماحولیاتی تغیرات دے خاتمے کوں سنجیدگی نال ڳھنݨ چنڳی ڳالھ اے۔ اے ڳالھیں انہاں امریکن بزنس کونسل آف پاکستان ولوں اسلام آباد اچ ݙوجھی سالانہ ماحولیاتی، سماجی، اتے گورننس (ای ایس جی) ایواڈز دی تقریب توں خطاب کریندیں ہوئیں آکھی۔ تقریب اچ سو توں ودھ نشابر ملٹی نیشنل سی ای اوز، بزنس لیڈرز، سرکاری افسر اتے ماحولیاتی ماہرین بشمول بروک ڈی مونٹلوزین، اکنامک کونسلر اتے  یو ایس ایمبیسی شریک تھیے جئیں اچ اے بی سی دی  ملیحہ فاروق اسماعیل، اے بی سی دی سیکرٹری جنرل عائشہ سروری، یو ایس ایڈ دی  سینئر پارٹنرشپ ایڈوائزر کنول بخارے دے علاوہ سسٹمز لمیٹڈ ،پراکٹر اینڈ گیمبل پاکستان، مونڈیلیز پاکستان، میک ڈونلڈز ، فلپ مورس اتے  اے بی سی دی ایگزیکٹو کمیٹی اتے جنرل باڈی دے ارکان شریک تھیے۔ انہاں ایوارڈز تقسیم کیتے اتے جتݨ آلیاں کوں مبارخ ݙتی۔ امریکن بزنس کونسل ولوں تھیوݨ آلا ݙوجھا ای ایس جی ایکسی لینس ایوارڈز کمپنیاں کیتے خصوصی اہمیت رکھیندے۔ تقریب اچ ریچارج پاکستان، جیڑھا جو پاکستان دے موسمیاتی موافقت اتے تخفیف دے منصوبے اچ ساریاں توں وݙی سرمایہ کاری اچوں ہک اے، دے کردار تے وی روشنی پاتی ڳئی۔ ریچارج گرین کلائمیٹ فنڈ اتے حکومت پاکستان وچال 77.8 ملین ڈالر دی شراکت داری اے جئیں اچ کوکا کولا فاؤنڈیشن، یوایس ایڈ اتے ڈبلیو ڈبلیوایف پاکستان سودھے ٻئے سانجھے داراں توں 12 ملین ڈالر دی ودھیکی سرمایہ کاری اتے تکنیکی تعاون شامل اے۔