وزیراعظم دا یوم آزادی جوش و خروش نال مناوݨ، مادر وطن کوں قائد دا پاکستان ٻݨاوݨ دا عزم، قومی استحکام اتے ملک کیتے ہر قربانی ݙیسوں، ارشد ندیم دی جت نال جشن آزادی دی خوشیاں ودھ ڳئن، شہباز شریف

اسلام آباد۔13اگست (اے پی پی) وزیراعظم محمد شہبازشریف آکھیا جو وزیراعظم دا یوم آزادی جوش و خروش نال مناوݨ، مادر وطن کوں قائد دا پاکستان ٻݨاوݨ دا عزم، قومی استحکام اتے ملک کیتے ہر قربانی ݙیسوں، ارشد ندیم دی جت نال جشن آزادی دی خوشیاں ودھ ڳئن۔ انشاء اللہ اے ملک ضرور قائد اعظم دا پاکستان ٻݨسی۔ صنعت ،زراعت ، تجارت اتے ٻئے شعبیاں کوں فعال اتے موثر ٻݨاوݨ کیتے پیداواری خرچے ڳھٹ کرݨ ضروری اے، بجلی اتے توانائی دے شعبے اچ اقدامات اتے کوششاں پاروں قوم کوں فیدہ تھیسی۔ اے ڳالھیں انہاں منگل کوں وفاقی کابینہ دے اجلاس اچ ڳالھ مہاڑ کریندیں ہوئیں آکھی۔ وزیراعظم آکھیا جو کل یوم آزادی دا ݙینھ قوم جوش تے خروش نال منیسی۔ وزیراعظم آکھیا جو ایں سال یوم آزادی بارے قوم دے ہیرو ارشد ندیم پاروں جشن آزادی دی خوشیاں دوبالا تھی ڳئن۔ ارشد ندیم اللہ تعالیٰ دے فضل تے کرم اتے آپݨی محنت اتے ریاضت نال چالھی سالیں بعد پاکستان کوں اولمپکس مقابلیاں اچ گولڈ میڈل جت تے ݙتے۔ وزیراعظم آکھیا جو ارشد ندیم قوم کیتے ہک چنڳی مثال اے۔ ݙینھ رات دی محنت، ماء پیو دی دعائیں اتے کوچ دی ٹریننگ پاروں ارشد ندیم پوری دنیا اچ پاکستان دا ناں اُچا کیتے۔ وفاقی کابینہ ارشد ندیم کوں خراج تحسین پیش کریندی اتے۔ ارشد ندیم کوں میڈل ڈیوݨ کیتے اساں صدر پاکستان کوں مکتوب ٻھیج ݙتے۔ وزیراعظم آکھیا جو انہاں ارشد ندیم کوں وزیراعظم ہاوس اچ وی سݙیے۔ کابینہ دے اجلاس توں خطاب کریندیں ہوئیں معیشت دی بہتری بارے کیتے ڳئے اقدامات دا ذکر کریندیں ہوئیں وزیراعظم آکھیا جو بجلی دے شعبے اچ ٻہوں محنت اتے کوشش تھئی اے۔ ایندے اچ وزیر پاور ، نائب وزیراعظم، وزارت خزانہ ، وزارت تجارت اتے وزارت منصوبہ بندی سودھے ٻئی وزارتاں دی کوششاں شامل ہن۔ وزیراعظم آکھیاجو ایف بی آر اساݙی ترجیحات دا اہم حصہ اے۔ ایف بی آر دے محصولات اچ بہتری دے بغیر مالی گنجائش ملسی نہ قوم اڳوں ترقی کر سڳدی اے۔ بجلی اتے توانائی اتے ایف بی آر اساݙے کیتے اہم ترجیحی شعبے ہن اتے انشاء اللہ بطور ٹیم ورک کم کریندیں ہوئیں اساکوں کامیابی ملسی۔ وزیراعظم آکھیا جو ماضی دی 77 سال دی بیماری توں جان چھڑاوݨ ضروری اے۔ قوم وی ایندی توقع کریندی پئی اے۔ معمول دا طریقہ ہݨ بلکل نہ چل سڳدا۔ ایف بی آر دے افسراں بارے وزیراعظم ݙسیاجو او انہاں اچوں کئی کوں نی ڄاݨدے، اساں ایں تے عرق ریزی نال کم کیتے اتے رپورٹس منڳوائی، خود دی راتیں کوں ٻیٹھا رہیا، اخبار اچ پڑھیا جو انہاں سندھ ہائی کورٹ توں سٹے ڳھدے جئیں تے میں وزیرقانون اتے اٹارنی جنرل توں پچھیا جو کیا معاملہ اے؟ کیونجو اساں تاں انہاں کوں او ایس ڈی وی نی ٻݨایا۔ الحمد للہ، او سٹے خارج تھیا۔ کوئی بندہ عقل کل نی ہوندا ٹیم ورک اہم ہوندے۔ وزیراعظم آکھیاجو بہتر کارکردگی دا فیدہ پوری قوم کوں تھیندے۔ میݙی گزارش اے جو رَل تے کم کریسوں تاں اوکھ مُک ویسن۔ مستحکم پاکستان کیتے رَل تے کم کرݨا پوسی۔