صدر مملکت آصف علی زرداری کوں ویتنام، مالدیپ اتے آئرلینڈ دے سفراء سفارتی سنداں پیش کر ݙتی

اسلام آباد۔13اگست (اے پی پی) صدر مملکت آصف علی زرداری آکھیا جو پاکستان آپسی دلچسپی دے سارے شعبیاں اچ دوست ملکاں نال تجارتی، اقتصادی اتے سرمایہ کاری دے تعلقات ودھاوݨ چاہندے۔ ایوان صدر دے پریس ونگ توں جاری بیان موجب صدرمملکت اے ڳالھیں ویتنام، مالدیپ اتے آئرلینڈ دے سفراء نال ڳالھ مہاڑ کریندیں ہوئیں آکھی جنہاں منگل کوں ایوان صدر اچ انہاں کوں سفارتی سنداں پیش کیتی۔ سفراء صدرمملکت نال اںج انڄ ملاقاتاں وی کیتی۔ صدر سفراء کوں پاکستان اچ تقرری تے مبارخ ݙیندیں ہوئیں آکھیا جو پاکستان سارے دوست ملکاں نال ݙوپاسہ تجارتی حجم ودھاوݨ تے توجہ ݙیندا پئے۔ صدر مملکت آکھیا جو پاکستان اچ مختلف شعبیاں اچ سرمایہ کاری دے بہترین موقع موجود ہن۔ سرمایہ کاراں کوں زراعت، توانائی، انفراسٹرکچر، مینوفیکچرنگ، انفارمیشن ٹیکنالوجی، کان کنی اتے گرین ٹیکنالوجی دے شعبیاں اچ سرمایہ کاری کرݨی چاہیدی اے۔ ایں توں پہلے سفراء کوں ایوان صدر پجݨ تے پاکستان دی مسلح فوج دے چاق و چوبند دستے گارڈ آف آنر پیش کیتا۔