پاکستان دیاں پاڑاں کھوکھلیاں کرݨ آلا نظام وٹاوݨ دا فیصلہ کیتے، 23 سو ارب روپے دے گردشی قرضے دے ٻھار نال ملک نئیں چل سڳدا، وزیراعظم

اسلام آباد۔13اگست(اے پی پی)وزیراعظم محمد شہبازشریف آکھیے جو پاکستان دیاں پاڑاں کھوکھلیاں کرݨ آلا نظام وٹاوݨ دا فیصلہ کیتے، 23 سو ارب روپے دے گردشی قرضے دے ٻھار نال ملک نئیں چل سڳدا، اے ڳالھ انہاں اسلام آباد اچ ملݨ آوݨ آلے بجلی ونݙݨ آلیاں کمپنیاں (ڈسکوز ) دے نویں لڳݨ آلے چیئرمین اتے بورڈ ممبران نال الیندے آکھی۔ وزیر اعظم اہم ذمہ داری ملݨ تے بجلی ونݙݨ آلیاں کمپنیاں (ڈسکوز ) دے نویں لڳݨ آلے چیئرمین اتے بورڈ ممبران کوں مبارک ݙتی اتے زور ݙتا جو او دسکوز دی کارکردگی چنڳی کرݨ کیتے قومی جذبے نال کم کریسن، ڈسکوز اچ بدانتظامی اتے کرپشن مکاوݨ کیتے کوششاں کیتاں ویسن، ڈسکوز اچ اصلاحات ترجیح ہین۔ وزیر اعظم آکھیا جو ملک اچ بجلی دے نظام کوں ٻہوں وݙے چیلنجز ہین، ڄیکر اساں ایں نظام اچ تبدیلیاں اتے اصلاحات کرڳھدیاں تاں پاکستان دی معیشت ٻہوں تیزی نال اڳو تے ودھسی، ایں سانڳے ݙینھ رات محنت کرݨی ہوسی اتے بغیر کہیں وانجھ دے کم کرݨا ہوسی۔ انہاں میرٹ اتے شفافیت نال ساریاں تعیناتیاں کرݨ تے وزیر توانائی سردار اویس لغاری، سیکرٹری توانائی اتے چیئرمین ایف بی آر راشد لنگڑیال سودھا سارے متعلقہ اداریاں دیان کوششاں دی تعریف کیتی اتے آکھیا جو ڈسکوز اچ بہتری ڳھن آ تے ایندی آئوٹ سورسنگ اتے نجکاری کیتی ویسی۔ وزیر اعظم آکھیا جو کوتاہی ورتݨ آلے ڈسکوز تے قانون کارروائی کیتی ویسی، ہر سال رلت نال 500 ارب روپے دی بجلی چوری کیتی ویندی اے، ڈسکوز کیتے وݙا چیلنج بلاں اچ ہیراپھیری روکݨ اے، ڈسکوز اچ اصلاحات اتے ڈھانچہ جاتی تبدیلیاں سانڳے تساں فٹ سولجرز ٻݨ تے اپݨیاں صلاھیتاں استعمال کرݨین، پچھلے سال ساݙیاں مجموعی وصولیاں 9.3 ٹریلین روپے ہن، گردشی قرضہ مجموعی وصولیاں دا ہک ترہائی اے، سوچݨا ہوسی جو ایں وݙے ٻھار اتے نقصانات نال نطآم کیوین چل سڳسی؟ فوری طور تے 3 چار ڈسکوز اچ سمارٹ میٹرنگ دا پائلٹ پراجیکٹ شروع کرݨا ہوسی جو نظام اچ خرابی تے قابو پویڄے، ایں سانڳے چین نال ڳالھ مہاڑ ٹردی پئی اے، کوئلے آلے پاور پراجیکٹس مکس کول تے چلیسوں جیندے نال درآمدی کوئلہ دی مد اچ سالانہ ہک ارب ڈالر بچسن، اسان فیصلہ آپ کرݨے جو چنڳی نیت نال کم کروں، امید اے ہک ٹیم ٻݨ تے بجلی دے شعبہ کوں اوکھ اچوں کݙھ ڳھنسوں، حکومت نہ صرف گھریلو صارفین ٻھل زراعت، صنعت، سپورٹس، دکانداراں سودھا سارے طبقیان کیتے بجلی دا ملھ ڳھٹاوݨ کیتے ودھ کم کریندی پئی اے جو معیشت ترقی کرے، برآمدات ودھن، ڄیڑھے لوک ایں سانڳے کم کریسن او قوم دے ھیرو اتے سر دا تاج ڳݨیسن ٻھل کوتاہی ورتݨ آلیاں کوں نا بخشیا ویسی، اساں سارا زور اتے توجہ پاکستان کوں سدھی راہ تے سٹݨ تے ہے اتے چنڳی کارکردگی ݙکھاوݨ آلیاں دی حوصلہ افزائی کیتی ویسی۔