وفاقی کابینہ دا اجلاس، نجکاری کمیشن بورڈ دے ممبران دی تعداد ودھا تے 11 کرݨ، فیڈرل ڈائریکٹوریٹ آف ایجوکیشن دے استاداں کوں ریگولرائز کرݨ دی منظوری

اسلام آباد۔13اگست(اے پی پی)وفاقی کابینہ نجکاری کمیشن بورڈ دے ممبران دی تعداد 8 توں ودھا تے 11 کرݨ، ودھیاں نشستاں تے صرف تریمتیں لاوݨ، فیڈرل ڈائریکٹوریٹ آف ایجوکیشن، اسلام آباد دے ݙیہاڑی دار اساتذہ کوں ریگولرائز کرݨ دے سپریم کورٹ دے فیصلے تے عمل درآمد سودھا پاکستان اتے ایکواڈور وچال ݙو طرفہ سیاسی مشاورت دے معاہدے تے دستخط دی منظوری ݙتی اے ڄݙاں جو یوریا کھاد ٻݨاوݨ آلے کارخانیاں کوں گیس ݙیوݨ اتے متعلقہ اداریاں کوں یوریا کھاد دا ملھ ڳھٹاوݨ توں روکݨ کیتے اقدامات دی ہدایت کیتی اے۔ کابینہ اجلاس دی اڳواݨی وزیراعظم محمد شہباز شریف کیتی۔ وفاقی کابینہ اقتصادی رابطہ کمیٹی دے 2 اگست 2024 دے اجلاس دے فیصلے تے ہدایت کیتی جو یوریا دی در آمد دی بجائے ستمبر 2024 دے بعد وی پاکستان اچ یوریا کھاد ٻݨآوݨ آلے کارخانیاں کوں گیس بلاتعطل ݙتی ونڄے، کساناں دی فی ایکڑ پیداواری لاگت ڳھٹاوݨ، زراعت دی ترقی کیتے زرعی ان پٹس دے ملھ ڳھٹائے ونڄن۔ اجلاس کابینہ کمیٹی برائے نجکاری دے 2 اگست 2024 دے اجلاس دے فیصلاں دی وی توثیق کیتی، وزیر اعظم منظور شدہ ایس او ایز دی نجکاری کیتے جامع پلان آندے کابینہ اجلاس اچ پیش کرݨ دی ہدایت کیتی۔ کابینہ وزارتِ خارجہ دی سفارش تے پاکستان اتے جمہوریہ گوئٹے مالا دی وزارتِ خارجہ اتے پاکستان اتے ایکواڈور وچال ݙوطرفہ سیاسی مشاورت دے معاہدیاں تے دستخط دی منظوری ݙتی۔ اجلاس کابینہ کمیٹی برائے لیجسلیٹو کیسز دے 31 جولائی 2024 دے اجلاس دے فیصلاں دی وی توثیق کیتی۔