پرامن اتے جمہوری جدوجہد نال پاکستان دا ٻݨݨ ہک بے مثل اتے بے نظیر باب اے، صدر مملکت آصف علی زرداری دا پاکستان دے 78 ویں یوم آزادی دے موقع تے سنیھا

اسلام آباد۔13اگست  (اے پی پی) صدر مملکت آصف علی زرداری پاکستان دے 78 ویں یوم ِآزادی تے پوری پاکستانی قوم کوں مبارخ ݙیندیں ہوئیں آکھیا جو یوم آزادی حق خود ارادیت کیتے ہندوستانی مسلماناں دی تاریخی سیاسی جدوجہد دا نقطہ عروج اے، ہک پرامن اتے جمہوری جدوجہد نال پاکستان دا ٻݨݨ ہک بے مثل اتے بے نظیر باب اے۔ اساں پاکستان کیتے قربانیاں ݙیوݨ آلے تحریک پاکستان دے رہنماواں، کارکناں اتے آپݨے وݙکیاں کوں خراج عقیدت پیش کریندوں۔  صدر مملکت پاکستان دے 78 ویں یوم آزادی 14 اگست 2024 دے موقع تے آپݨے سنیھے اچ آکھیا جو اڄوکے چیلنجز نال نبڑݨ کیتے اساکوں آپݨے اختلاف ہک پاسے رکھ تے ملک دےاتحاد، سالمیت اتے معاشی استحکام کیتے پرعزم تھی تے کم کرݨ دی لوڑھ اے۔ انہاں آکھیا جو اساݙے ملک کوں بےشمار انسانی اتے قدرتی وسائل ݙتن اتے اے اساں ساریاں دی ذمہ واری اے جو عوام دی فلاح تے بہبود کیتے انہاں وسائل کوں استعمال کروں۔ اساکوں قائداعظم دے فرمان ” اگر اساں ایں عظیم مملکت پاکستان کوں خوش و خرم اتے خوشحال ٻݨاوݨ چاہندوں تاں اساکوں آپݨی ساری توجہ لوکاں خصوصی طور عوام الناس اتے غریب طبقے دی فلاح تے بہبود تے ݙیوݨی چاہیدی اے” نال تحریک ڳھنݨ دی لوڑھ اے۔ انہاں آکھیا جو آؤ، عہد کروں جوں اساں عوام دی ترقی کیتے کم کریسوں اتے پاکستان کوں ہک خوشحال ملک ٻݨیسوں۔ اللہ تعالیٰ اساں ساریاں دا حامی و ناصر ہووے۔ آمین!