ارشد ندیم دی جت یوم آزادی تے قوم کیتے تحفہ اے، وزیراعظم دا عشائیہ توں خطاب، ملک اچ کھیݙاں دے ودھارے کیتے کمیٹی ٻݨاوݨ دا اعلان

اسلام آباد۔14اگست  (اے پی پی) وزیراعظم محمد شہباز شریف ارشد ندیم دی جت کوں یوم آزادی تے قوم کیتے تحفہ قرار ݙیندیں ہوئیں ملک اچ کھیݙاں دے ودھارے کیتے کمیٹی ٻݨاوݨ دا اعلان کیتا اتے آکھیا جو حکومت کھیݙاں دے ودھارے کتیے صوبائی حکومتاں نال رَل تے کم کریسی۔ محنت اتے اتفاق نال ملک دے چیلنجز تے قابو پیسوں اتے رل تے ملک کوں عظیم ٻݨیسوں۔ اے ڳالھیں انہاں پیرس اولمپکس اچ پاکستان کیتے طلائی تمغہ جتݨ آلے جیولین تھرو رایتھلیٹ ارشد ندیم  دے اعزاز اچ وزیراعظم ہاؤس اچ عشائیے توں خطاب کریندیں ہوئیں آکھی۔ وزیراعظم ہاؤس پجݨ تے وزیراعظم ارشد ندیم، انہاں دی اماں اتے انہاں دے ٹبر دا استقبال کیتا۔ وزیراعظم آکھیاجو ارشد ندیم پاکستان کوں یوم آزادی توں پہلے ہک شاندار تحفہ ݙتے۔ وزیراعظم محمد شہباز شریف آکھیا جو ارشد ندیم 25 کروڑ پاکستانی عوام دے ہیرو اتے دلاں دی دھڑکن ہن۔ ارشد ندیم چالھی سالیں بعد پاکستان کیتے اللہ تعالیٰ دی رحمت، محنت اتے ماء پیو اتے قوم دی دعائیں نال گولڈ میڈل جتیے۔ ایں تے پوری پاکستانی قوم شکریہ ادا کریندی اے۔ یوم آزادی دے موقع تے انہاں اساݙی خوشیاں ودھا ݙتن۔ انہاں جیولین تھرو اچ ریکارڈ ٻݨائے، قوم دا مورال اُچا کیتے۔ انہاں آکھیا جو ارشد ندیم دی اماں دی دعائیں اتے ارشد ندیم کوں جت اتے پوری قوم کوں عزت ملی جئیں تے انہاں دے والدین دا شکریہ ادا کریندوں۔ تساں عظیم ماں دے عظیم پتر ہیوے۔ انہاں آکھیا جو وفاقی اتے صوبائی حکومتاں کھیݙاں دے ودھارے کیتے رل تے کم کرن۔ ہاکی، کرکٹ، سکوائش کوں ولا بحال کریسوں۔ سینئر کھݙاری کھیݙاں دے ودھارے کیتے آپݨی تجویزاں ݙیون تانجو پاکستان دی عظمت کوں واپس آندا ونڄ سڳے۔ وزیراعلی پنجاب ارشد ندیم کیتے 10 کروڑ روپے جڈانجو وزیراعلی سندھ 5 کروڑ روپے انعام دا اعلان کیتے۔  وزیرِ اعظم ارشد ندیم دی پیرس اولمپکس اچ شاندار جت، طلائی تمغہ جتݨ اتےاولمپک ریکارڈ ٻݨاوݨ تے انہاں کیتے پندراں کروڑ روپے دے انعام دا وی اعلان کیتا۔ وزیراعظم آکھیا جو 15 کروڑ روپے دے ایں انعام تے ٹیکس دی کٹوتی کائنا تھیسی۔  وزیرِ اعظم اسلام آباد اچ ایف 9 اتے ایف 10 سیکٹر وچال سڑک کوں ارشد ندیم دے ناں نال منسوب کرݨ دا وی اعلان کیتا۔ وزیراعظم جناح اسٹیڈیم اسلام آباد اچ نینگراں کوں کھیڈاں دی تربیت کیتے ارشد ندیم ہائی پرفارمنس اکیڈمی ٻݨاوݨ دا وی اعلان کیتا جتھ 2028 اولمپکس کیتے ایتھلیٹس تے کھݙاریاں کوں تربیت ݙے تے مقابلے کیتے تیار کیتا ویسی۔ وزیرِ اعظم کھݙاریاں دی بہبود، ریٹائرڈ کھڈاریاں دی لوڑھ پوری کرݨ اتے انہاں کوں تربیت دے موقع ݙیوݨ کیتے ہک ارب روپے دے اسپورٹس انڈومنٹ فنڈ دا وی اعلان کیتا۔ پیرس اولمپکس اچ گولڈ میڈل جتݨ آلے ارشد ندیم آکھیا جو ایں جت تے اللہ تعالیٰ دا شکر ادا کرینداں۔ وزیراعظم محمد شہباز شریف، پوری پاکستانی قوم، آپݨے والدین اتے میڈیا دا شکر گزار ہم جنہاں دی دعائیں پاروں پیرس اولمپکس اچ ریکارڈ ٻݨا تے گولڈ میڈل جتیے۔