بلوچستان دی خوشحالی تے ترقی  پائیدار امن نال جڑی ہوئی اے ،بلوچستان دی ترقی سانڳے سارے سٹیک ہولڈرز کوں ھک صفحے تے آوݨا ہوسی ،وفاقی وزیرداخلہ محسن نقوی

اسلام آباد۔18اگست(اے پی پی) وفاقی وزیرداخلہ محسن نقوی آکھیے بلوچستان دی خوشحالی و ترقی  پائیدار امن نال جڑی ہوئی اے ،بلوچستان دی ترقی سانڳے سارے سٹیک ہولڈرز کوں ھک صفحے تے آوݨا ہوسی ،بلوچستان دے نینگراں کوں بااختیار بݨاوݨ سانڳے جامع اقدامات دی لوڑھ اے ۔وزارت داخلہ توں جاری اعلامیہ موجب وفاقی وزیرداخلہ محسن نقوی فرنٹیئر کور ساؤتھ بلوچستان دے ہیڈ کوارٹر دا دورہ کیتے۔ فرنٹیئر کور ساؤتھ  دے آئی جی میجر جنرل بلال سرفراز خان وفاقی وزیر داخلہ محسن نقوی دا استقبال کیتا۔ محسن نقوی فرنٹیئر کور ساؤتھ دے ہیڈ کوارٹر اچ یادگار شہداء تے حاضری  ݙتی،پُھل رکھیے تے فاتحہ پڑھی۔ انھاں  شہداء دے اُچے درجات دی دعا منگی ۔ وزیرداخلہ محسن نقوی فرنٹیئر کور دے شہداء دیاں قربانیاں کوں خراج عقیدت پیش کیتے۔ ایں موقع تے وفاقی وزیرداخلہ  دی صدارت اچ فرنٹیئر کور ساؤتھ  دے ہیڈ کوارٹر اچ اہم اجلاس تھیا ۔ وزیرداخلہ کوں فرنٹیئر کور ساؤتھ دی پیشہ وارانہ کارکردگی ،فتنہ الخوارج دے خلاف آپریشنز اتے انسداد سمگلنگ دیاں کاروائیاں تے بریفنگ ݙتی ڳئی ۔وزیرداخلہ بلوچستان اچ امن دے قیام تے انسداد سمگلنگ سانڳے فرنٹیئر کور ساؤتھ دی کارکردگی دی تعریف کریندے آکھیے فتنہ الخوارج دے مذموم عزائم ناکام بݨاوݨ اچ ایف سی ساؤتھ فرنٹ لائن تے ہے،فرنٹیئر کور اوکھے حالات اچ امن سانڳے مثالی خدمات انجام ݙتن ،فرنٹیئر کور ساؤتھ دے افسر تے نینگر بلوچستان اچ امن سانڳے ہراول دستے دا کردار نبھیندے پئن ۔ محسن نقوی آکھیے فرنٹیئر کور ساؤتھ دے افسراں تے نینگراں دی پیشہ ورانہ مہارت اتے بہادری تے ماݨ اے ،فرنٹیئر کور ساؤتھ دیاں ضرورتاں کوں وسائل اچ رہندے ہوئیں پورا کیتا ویسی ۔  وزیر داخلہ محسن نقوی آکھیے بلوچستان دی خوشحالی تے ترقی  پکے امن نال جڑی ہوئی اے ،بلوچستان دے نینگراں کوں بااختیار بݨاوݨ سانڳے جامع اقدامات دی لوڑھ اے ۔بلوچستان دی ترقی سانڳے سارے سٹیک ہولڈرز کوں ھک صفحے تے آوݨا ہوسی ۔ محسن نقوی مزید آکھیے بلوچستان اچ کرکٹ اتے ٻیاں کھیݙاں دے مقابلیں نا نینگراں اچ صحت مند سرگرمیاں ودھسن ۔ اجلاس اچ بریفنگ اچ ݙسایا ڳئے گزریل 6 مہینے اچ  4 ارب 70 کروڑ روپے دی غیر قانونی چیزاں ضبط کیتیاں ڳئن