ملک اچ 250 ای روز گار سینٹر زکھولݨ ویندے پیوں ،وزیر اعظم معاشی اوکھ دے باوجود آئی ٹی شعبے سانڳے 60 ارب روپے  دا بجٹ مقرر کیتن، وزیر مملکت آئی ٹی شزہ فاطمہ خواجہ دی پریس کانفرنس

اسلام آباد۔18اگست(اے پی پی) وزیر مملکت آئی ٹی شزہ فاطمہ خواجہ آکھیے پاکستان سٹارٹ اپ فنڈ بݨایا ویسی ، ملک اچ 250 ای روز گار سینٹر زکھولݨ ویندے پیوں ،  کوڈنگ سکلز دے حوالے نال 5 زباناں اچ پروگرام لانچ کریندے پیوں ، ڈیجی سکلز اچ 45 لکھ توں ودھ ٻالاں دا اندراج تھئے ، پاکستان پہلی واری میٹا دے اے آئی عالمی مقابلے اچ حصہ ڳھدے ، اسلام آباد آئی ٹی پارک 10 ہزار توں ودھ لوکاں کوں زورگار ݙیسی، اسلام آباد اتے کراچی شہر اچ سپیشل ٹیکنالوجی پارک بݨیسوں ، آئی ٹی سانڳے بجٹ ایں شعبے دی ترقی سانڳے وزیر اعظم محمد شہباز شریف دے عزم کوں ظاہر کریندے، وزیراعظم معاشی اوکھ دے باوجود آئی ٹی شعبے سانڳے 60 ارب دا بجٹ مقرر کیتے، حکومتی کماں کوں پیپر لیس کریسوں جو کم سوکھا تھی سڳے ، ڈیجیٹائزیشن نال حکومتی امور اچ شفافیت آسی، معیشت دی ڈیجیٹائزیشن سانڳے قومی ڈیجیٹائزیشن کمیشن بݨایا ویندا پئے ، وزیر اعظم محمد شہباز شریف اقتدار سنبھلیندے ہی ڈیجیٹائزیشن تے زور ݙتا،  وزیر اعظم  دی ترجیحات اچ آئی ٹی دا شعبہ سر فہرست اے، ایس آئی ایف سی دے تحت ملک اچ سرمایہ کاری ودھدی پئی اے ۔ وزیر مملکت انفارمیشن ٹیکنالوجی (آئی ٹی) شزہ فاطمہ خواجہ اے ڳالھ پریس کانفرنس اچ آکھی اے ۔ انھاں آکھیے اڄ دی میڈیا ٹاک دا مقصد  حکومت آئی ٹی دے حوالے نال اقدامات ݙساوݨ اے ۔ اڄوکے سال ملکی تاریخ اچ ساریں توں ودھ آئی ٹی برآمدات تھئن، گزریل مالی سال برآمدات دا حجم 2.6 ارب ڈالر ہئی اڄوکے سال برآمدات دا حجم 3.2 ارب ڈالر توں ودھ رہیا ۔ برآمدات اچ ودھارے تے پوری قوم کوں مبارخ ݙیندی ہاں ۔ وزیر مملکت آکھیے میں سارے نینگراں ، ٻالیں تے ٻالڑیاں دا شکریہ ادا کرݨ چاہندی ہاں جنھاں آپݨی محنت تے کوششاں نال ایں ہدف کوں ممکن بݨائے ، حکومتی اقدامات پاروں اے ہدف پورا تھی سڳیے تساکوں ایں حوالے نال ݙساوݨ چاہندی ہاں ،وزیراعظم محمد شہباز شریف اتے ایس آئی ایف سی دی  ہدایات دے تحت اہم ترجیحات طے کیتیاں ڳئن تاں جو ملک اچ ودھ توں ودھ سرمایہ کاری آسڳےتے صنعتی شعبہ ترقی کرے، انھاں اچ آئی ٹی دا شعبہ اولین ترجیح اے۔ وزیراعظم نیشنل ڈیجیٹلائزیشن تے ساریں توں ودھ زور ݙتے ، حکومت دے شروع دے کجھ ہفتے اچ کمیٹی بݨائی ڳئی تے ھک ٻل ڈرافٹ کیتا ڳئے ،اے ٻل ہݨ وزارت قانون بھیڄا ڳئے تے وختی نیشنل کمیشن دا قیام عمل اچ گھن آیا ویسی جیں دے وزیراعظم چیئرمین ہوسن تاں جو پاکستان اچ معیشت، سوسائٹی اتے گورننس دی ڈیجیٹائزشن کیتی ونڄ سڳے۔ شزہ فاطمہ خواجہ مزید آکھیے جݙاں اساں ڈیجیٹل اکانومی دی ڳالھ کریندوں ایندے اچ ایف بی آر دی ٹیکس محصولات ، ریونیو وصولیاں، شفافیت، کارکردگی اتے عام عوام دی سوکھ یقینی بݨاوݨ اے ، حکومت دی ڈیجیٹلائزیشن تے انھاں آکھیے انٹر منسٹری خط وکتابت دے حوالے نال اساں چاہندوں حکومت پاکستان کوں وختی پیپر لیس کیتا ونڄے ، ایں توں حکومت دی کارکردگی اچ شفافیت آسی تے کارکردگی ودھسی۔ ڈیجیٹلائزیشن توں فائلاں دا ھک توں ݙوجھی جاہ بھیڄݨ اچ سوکھ تھیوے تے اے پتہ لڳ سڳے جو حکومتی کم اچ کتھاں اوکھ تھیندی پئی اے ۔ وزیر مملکت آکھیے ایندے نال گھٹ ویلھے اچ کم پورا کیتا ونڄ سڳسی ، اساں کجھ سالاں اچ ڈیجیٹلائزیشن کرگھنسوں تاں ایں توں ساݙی جی ڈی پی کم از کم ݙوگنا ضرور تھی سڳدی اے آندے ھک ݙو سال اچ آپݨے ہدف پورے کر گھنسوں ۔ بجٹ دی تیاری اتے اوکھ دے حوالے نال انھاں آکھیےساری اوکھ دے باوجود آئی ٹی سیکٹر اچ وزارت آئی ٹی جتنی ڈیمانڈ کیتی وزیراعظم ایندی منظوری ݙیندے 60 ارب روپے دا بجٹ ݙتا۔ اتنی وݙی رقم تے ایہو جیہی اوکھ اچ اے ݙیوݨ نال وزیراعظم دا وژن نظر آندے تے انھاں دی ترجیحات ݙسیندے۔ ایں اچوں4 ارب روپے توں ودھ بجٹ ٻال تے ٻالڑیاں دی ٹریننگ اتے انھاں دے روزگار یقینی بݨاوݨ سانڳے رکھیے ایں توں انڄ 3 لکھ لوکاں دی ہواوے توں تربیت دے حوالے نال وزیراعظم دی ذاتی کوششاں نال چین نال معاہدہ تھئے ایویں گوگل، مائیکروسافٹ اتے میٹا وغیرہ نال وی رابطے اچ ہیسے ٻالاں کوں ہنر تے سرٹیفکیٹ ݙویسوں تے باروزگار بݨیسوں ۔ پہلی واری پاکستان میٹا اے آئی اچ حصہ ڳھدا، اے اقدامات ملک اچ آئی ٹی صنعت دی ترقی کوں ظاہر کریندن ٻال تے ٻالڑیاں دی محنت ݙکھیندن ، وزارت دے اہتمام نال تربیتی پروگراماں اچ 45 لکھ توں ودھ ٻال مختلف ہنر سکھدے پئن ، ڈیجی سکلز دے تریجھےمرحلے اچ پرامٹ  انجینئرنگ کوں لازمی قرارݙتا ڳئے تاں جو مصنوعی ذہانت دی دنیا اچ ھک بنیادی ہنر دے حوالہ نال تربیت ݙتی ونڄ سڳے اےعلم ہر ٻال کنے ہووݨ ضروری اے جیں توں اساں دنیا نال قدم ملا تے ٹر سڳوں ایویں وزارت آئی ٹی کوڈی سکلز دا پروگرام وی شروع کیتے جیں اچ 5 مختلف وݙیاں زباناں اچ 10 ہزار توں ودھ ٻالاں کوں کوڈنگ سکلز ݙتے ویسن۔ آندے ویلھے ایندی لوڑھ ہوسی ایں پروگرام کوں وختی پرائمری سکولاں اچ شروع کیتا ویسی ٻال وݙے تھیوݨ دے نال نال مستقبل دی ضرورتاں دے حوالے نال تیار ہوون ایں توں آئی ٹی انقلاب سانڳے انھاں کوں تیار کیتا ویسی ۔ آئی ٹی صنعت دے انفراسٹرکچر دے مسئلے تے انھاں آکھیے آئی ٹی دے ایس ایم ایز کوں دفتر مہانگے پوندن تے خرچے ودھ ویندن جیں کوں پورا کرݨ اوکھا ہوندے۔ حکومت پاکستان ایں سانڳے چنڳاں خاصا بجٹ رکھیے ،اسلام آباد تے کراچی اچ آئی ٹی پارک بݨائے ویسن۔ اسلام آباد آلا آئی ٹی پارک ساݙی کوشش اے آندے سال مارچ تئیں مکمل کر ڳھدا ویسی ول کراچی آلا شروع کریسوں جیڑھا کورین بھراویں دی مدد نال بݨایا ویندا پئے ساݙی کوشش اے اسلام آباد آئی ٹی پارک 10  ہزارتوں ودھ روزگار دے موقع بݨیسی تے سہولت گھنݨ آلیاں کمپنیاں لکھاں ڈالرز کما تے قومی معیشت اچ حصہ پاون ۔ سپیشل ٹیکنالوجی پارکس 43  دے نیڑے ہن ساݙی کوشش اے 80 مزید پارکس تیار کیتے ونڄن اساں عمارتاں نی بݨیندے بلکہ عمارت رکھݨ آلے ایں کوں ٹیکنالوجی پارک بݨاوݨ دے خواہشمند اداریں کوں معاونت ݙیندن جو ودھ توں ودھ انفراسٹرکچر آئی ٹی کوں ݙتا ونڄ سڳے ایویں پورے ملک اچ 250 توں ودھ ای روزگار مراکز دا اعلان کیتا ڳئے ۔ ای روزگار سینٹر محمد شہباز شریف پنجاب توں شروع کیتے ہن تے اندازہ تھئے جو انہاں دی کتنی اہمیت اے انھاں مرکز توں لکھاں ٻالاں فیدہ چاتے ۔ وزیراعظم پاکستان سٹارٹ اپ فنڈ بݨاوݨ دا آکھیے ݙو ارب روپے توں شروع فنڈ نال ترقی اچ مدد ملسی جیں توں نینگر عالمی سطح تے سرمایہ کاری گھن سڳسن ۔ نیشنل انکیوبیشن مرکز دے حوالے نال وزیر مملکت آکھیے کراچی ، لاہور ، اسلام آباد تے پشاور اچ مرکز تیار ہن ترائے نویں مرکز بݨائے ویندے پئن ھک صرف تریمتاں سانڳے مختص ہوسی پاکستان دی پہلی جینڈر ڈیجیٹل لٹریسی پالیسی لانچ کیتی ڳئی اے تاں جو فیملیاں کوں ٻالڑیاں دی اہمیت دا ݙسیا ونڄ سڳے ۔ ایندے نال نال نیشنل انکیوبیشنز سینٹر دے حوالے نال انھاں آکھیے بائیکیا ایں توں شروع تھیا تے 29 ملین ڈالر دے فنڈ ڳھدن ایویں ٻیاں کمپنیاں وی فنڈ ڳھدن ۔ سٹارٹ اپس اچ ٻالاں دی مصنوعات اچ جتنی سرمایہ کاری کریسوں تے مدد ݙیسوں ، امید اے ایں توں ترقی ودھسی