صوبے سیاست کرݨ دی بجائے پنجاب آلی کار بجلی دے بلاں اچ سوکھ ݙیون، وزیراعظم شہباز شریف دا وفاقی کابینہ دے اجلاس نال خطاب

اسلام آباد۔20اگست(اے پی پی)وزیراعظم شہباز شریف آکھیے جو صوبائی حکومتاں کوں سیاست کرݨ دی بجائے بجلی صارفین کوں ریلیف ݙیوݨ کیتے پنجاب حکومت دی ریس کرݨی چاہیدی اے، قومی فنانس کمیشن سانڳی انہاں کوں منتقل تھیوݨ آلے کھرباں روپے دا ہک حصہ عوام دی سہولت کیتے کݙھݨا چاہیدے۔ اسلام آباد اچ وفاقی کابینہ دے اجلاس دی اڳواݨی کریندے وزیراعظم آکھیے جو پنجاب حکومت اپݨے ترقیاتی بجٹ اچوں 45 ارب روپے بجلی دے انہاں صارفین کوں ݙو مہینے دی مدت کیتے 14 روپے فی یونٹ ریلیف ݙیوݨ کیتے خرچ کیتن ڄیڑھے 200 توں 500 یونٹ بجلی استعمال کریندے پئے ہیں، اے عوام دا اے حق اے، وفاقی حکومت دا ایں ریلیف پیکیج اچ کوئی حصہ نئیں، ٻئے صوبیاں کوں وی ایویں کرݨا چاہیدے، ڄیکر خیبرپختونخوا حکومت عوام کوں اینڄھا ریلیف ݙیوݨ چاہندی اے تاں ساکون خوشی تھیسی، سیاست توں بچݨ اتے حقائق کوں مسخ نئیں کرݨا چاہیدے۔ کے پی حکومت دے نمائندے ولوں وفاقی حکومت دے کہیں وانڄھ دے سلوک دا الزام لاوݨ آلی تنقید مسترد کریندے انہاں وضاحت کیتی جو انہاں دا ایں پیکج نال کوئی تعلق کائنی۔ انہاں کابینہ کوں ݙسائے جو این ایف سی دے تقریباً 60 فیصد فنڈز صوبیاں کوں ݙتے ڳن، وفاقی حکومت کوں غیر ملکی امداد نال چلݨ آلے منصوبیاں تے قرضیاں اتے سود دی ادائیگی دی صورت اچ ودھ چیلنجز ݙیکھݨے پن۔ انہاں اجلاس کوں ݙسایا جو وفاقی حکومت 200 یونٹ تئیں بجلی استعمال کرݨ آلے گھریلو صارفین کوں 3 مہینے دا ریلیف ݙیوݨ کیتے 50 ارب روپے وی رکھین ڄیڑھا کل گھریلو صارفین دا 86 فیصد ٻݨدے، بلوچستان حکومت نال شراکت داری اچ صوبے اچ 70 ارب روپے دی لاگت نال 28 ہزار ٹیوب ویل شمسی توانائی تے منتقل کیتے ویسن جیندے اچوں 55 ارب روپے وفاقی حکومت برداشت کریسی۔ انہاں آکھیا جو ایندے نال 28,000 کساناں کوں فیدہ پڄسی اتے نال ہی بجلی چوری دے مسئلے تے وی قابو پاتا ونڄ سڳسی، وفاقی حکومت صوبائی حکومتاں دی مشاورت نال معیشت دے استحکام اتے ملکی تجارت اتے برآمدات ودھاوݨ کیتے طویل المدتی اقدامات کریندی پئی اے، وفاقی حکومت آئی ایم ایف کوں ݙساوݨ دے بعد او سارے اقدامات کریسی، پی ٹی آئی دے معاہدے دی خلاف ورزی دے “غیر معقول” اقدام ملک کوں ݙیوالہ تھیوݨ تے پچا ݙتا ہا۔ حکومت دی معاشی پالیسیاں تے الیندے وزیراعظم شہباز شریف آکھیا جو مہنگائی 38 فیصد توں ڳھٹ تے 11.5 فیصد ری ڳئی اے ٻھل صورتحال ٻئی چنڳی کرݨ کیتے حالی وی ودھ کوششاں دی لوڑھ اے۔ انہاں 13.5 ٹریلین روپے دا ریونیو ہدف پورا کرݨ اتے پاور سیکٹر دے نقصانات تے قابو پاوݨ تے وی زور ݙتے۔ وزیر اعظم کابینہ دی توجہ ملک دے کڄھ حصیاں اچ شدید بارشاں اتے ایں سانڳے آوݨ آلے چھل نال تھیوݨ آلیاں اموات اتے تباہی دو توجہ ݙیوائی اتے صوبیاں اتے پی ڈی ایم اے دے تعاون نال نیشنل ڈیزاسٹر مینجمنٹ اتھارٹی (این ڈی ایم اے) دی تعریف کیتی۔ کابینہ مینھ اتے چھل پاروں مختلف واقعات اچ فوت تھیوݨ آلے لوکاں اتے دہشت گردی دے مختلف واقعات اچ جان ݙیوݨ آلے جواناں کیتے فاتحہ وی پڑھی۔