پاکستان دہشت گردی دے خلاف جنگ دی وݙی قیمت چکائی اے، ہزاراں شہریاں اتے سکیورٹی اہلکاراں ونجائن، صدر مملکت آصف علی زرداری

اسلام آباد۔21اگست  (اے پی پی) صدر مملکت آصف علی زرداری آکھیا جو پاکستان دہشت گردی دے خلاف جنگ دی وݙی قیمت چکائی اے، ہزاراں شہریاں اتے سکیورٹی اہلکاراں ونجائن۔پاکستان دی سابق وزیر اعظم محترمہ بینظیر بھٹو کوں وی دہشت گرداں شہید کیتا۔ ملک دے کئی سیاسی اتے مذہبی رہنما وی دہشت گرداں دے ہتھوں جان توں ڳئے۔ دہشت گردی ملکی معیشت دا ارباں ڈالر دا ضیان کیتے۔ پاکستان مخالف قوتاں دہشت گردی دی حمایت، خفیہ مالی تعاون اتے اتھوں دہشت گردی دی کاروائی کیتے عسکریت پسند ٻھجیندی پئن۔ ایوان صدر دے پریس ونگ توں بدھ کوں جاری بیان موجب صدرمملکت اے ڳالھیں متاثرین دہشت گردی دی یاد اتے خراج تحسین دے جڳ ݙیھاڑ دے موقع تے آپݨے سنیھے اچ آکھی جیڑھا اڄ 21 اگست کوں منایا ویندا پئے۔ انہاں آکھیا جو متاثری دہشت گردی دی یاد اتے انہاں کوں خراج تحسین پیش کرݨ دے جڳ ݙیھاڑ دے موقع تے اساں دہشت گردی دے سارے متاثرین اتے پاکستانی شہریاں کوں خراج عقیدت پیش کریندوں۔ اساں دہشت گردی دے خلاف ملکی دفاع اچ جاناں دا نذرانہ ݙیوݨ آلے سکیورٹی فورسز اتے قانون نافذ کرݨ آلے اداریاں دے بہادر اہلکاراں کوں وی خراج عقیدت پیش کریندوں۔ انہاں آکھیا جو ایں سال دا  موضوع ”متاثرین ِدہشت گردی بطور امن دے علمبردار اتے معلم“  اجاگر کریندے جو زندہ بچ ونڄݨ آلے لوک امن دے ودھارے اتے پرتشدد انتہاپسندی دے تباہ کن اثرات بارے آگاہی ݙیوݨ اچ اہم کردار ادا کر سڳدن۔ صدرمملکت آکھیا جو اساݙی قوم انہاں چیلنجز دے مقابلے اچ بے مثال عزم اتے استقامت ݙکھائی اے۔ پاکستان دنیا دا واحد ملک اے جئیں کامیابی نال دہشت گرد قوتاں تے قابو پاتے اتے ݙو ݙھاکیاں توں اے جنگ کلھیں لڑدا پئے۔ اساݙی کوششاں کوں عالمی سطح تے منیا ڳئے اتے اساں بین الاقوامی انسداد دہشت رگدی دی کوششاں اچ آپݨا کردار ادا کرݨ کیتے پرعزم ہیسے۔ انہاں آکھیا جو اڄ وی اساݙی بہادری سکیورٹی فورسز اتے قانون نافذ کرݨ آلے ادارے دہشت گرداں دے خلاف کاروائی جاری رکھی ہوئی اے اتے قوم دی امن تے سلامتی کیتے آپݨی جاناں دا نذرانہ ݙیندے پئن۔فوجی آپریشنز نال کئی دہشت گرد نیٹ ورکس کوں کامیابی نال ختم کیتا ڳئے۔ صدر مملکت  آصف علی زرداری آکھیا جو اڄ اساں دہشت گرداں دے خلاف فیصلہ کن کاروائی جاری رکھݨ دا عزم کریندوں۔ اساݙا بنیادی مقصد عوام دی حمایت نال دہشت گردی دا خاتمہ اے۔ انہاں آکھیا جو دہشت گردی ہک عالمی چیلنج اے جئیں دے خاتمے کیتے عالمی برادری سانجھی کوششاں کرݨ دی لوڑھ اے۔ اساکوں بین الاقوامی تعاون ودھاوݨا پوسی۔ انٹیلی جنس شیئرنگ ودھاوݨی پوسی اتے انتہا پسندی اتے دہشت گردی کوں ہوا ݙیوݨ آلے بنیادی اسباب دا سدباب کرݨا پوسی۔ میکوں یقین اے جو اساں سارے رَل تے ساریاں کیتے ہک محفوظ اتے پر امن دنیا ٻݨا سڳدوں۔