پاکستان دی ترقی دی کنجی نوجوان نسل دے ہتھ اچ اے، نوجواناں کوں کیتے سارے وسائل لیسوں، وزیراعظم محمد شہباز شریف دا قومی یوتھ کنونشن نال خطاب

اسلام آباد۔21اگست(اے پی پی)وزیراعظم محمد شہباز شریف آکھیے جو پاکستان دی ترقی دی کنجی نوجوان نسل دے ہتھ اچ اے، نوجواناں کوں کیتے سارے وسائل لیسوں، بجلی، محصولات اتے برآمدات سودھا سارے چیلنجز نال نمٹݨ کیتے کم کریندے پئے ہیں۔ اسلام آباد اچ قومی یوتھ کنونشن نال خطاب کریندے وزیراعظم کنونشن دے شرکاء دا خیرمقدم کریندے آکھیے جو کڄھ ݙینھ پہلے یوم آزادی ٻہوں جوش و جذبے نال منایا ڳئے اتے انہاں خوشیاں اچ 40 سال بعد پاکستان گولڈ میڈل جیت تے انہاں خوشیاں کوں ودھائے، ارشد ندیم ہمت نئیں ہریا، انہاں اوکھے حالات ݙٹھن، جستجو اتے لگن نال ارشد ندیم ݙینھ رات محنت کیتی اتے پاکستان کوں گولڈ میڈل جتوا تے ثابت کیتے جو حالات کتنے اوکھے اتے چیلنجز ہوون ڄیکر قوماں اے فیصلہ کر ڳھنن جو اساں اوکھ دا مقابلہ کرݨے اتے اساں ہار نئیں منݨی تاں ڄاݨ ڳھنو ڄیویں قائداعظم دی ولولہ انگیز اڳواݨی اچ پاکستان وݙیاں قربانیاں دے بعد وجود اچ آئے، نہ صرف ماضی دیاں کوتاہیاں دور تھی ویسن ٻھل پاکستان ڄڳ اچ اپݨا ونڄایا وقار ولا ڳھن سڳدی۔ انہاں آکھیا جو پاکستان دی کنجی نوجوان نسل دے ہتھ اے، نوجواناں کل دے پاکستان کوں سڄاکا ٻݨاوݨے،  حکومت دا فرض اے جو او نوجواناں کوں جدید علوم ݙیوے، انہاں کوں جدید ٹیکنالوجی ݙیوے تاں جو پاکستان اچ ترقی و خوشحالی دا انقلاب آسڳے۔ وزیراعظم آکھیا جو بین الاقوامی سکالرشپس سانڳے پچھلے 3 سالاں اچ پاکستان ٹاپ تے رہے ڄیڑھا ثبوت اے جو ساݙی نوجوان نسل کوں مواقع ݙتے ونڄن تاں پاکستان ولوں کوئی معاشی تے دفاعی لحاظ نال میلی اکھ نال نا ݙیکھ سڳسی۔ انہاں آکھیا جو جو ساکوں یکسوئی، اتفاق اتے اتحاد نال اڳو تے ودھݨا ہوسی، 77 سال دے پندھ اچ یقیناً عظیم کامیابیاں وی کیتن اتے ناکامیاں وی تھئین، ڄیکر اساں صدق دل نال ایندا تجزیہ نہ کریسوں تاں صحیح نتیجے تے نئیں پڄ سڳدے، 1973ء دے آئین پاکستان کوں معاشرتی و سیاسی لحاظ نال جوڑیا ہوئے، اے آئین سیاسی زعماء متفقہ ٻݨائے ڄیڑھا قومی وحدت دا ہک نشان اے، ایویں ہی پاکستان سارے اوکھ دے باوجود ہک جوہری طاقت ݨیے، ڄڳ دی پابندیاں دے باوجود اٹل فیصلے اتے عزم نال پاکستانی اسلامی دنیا دی واحد ایٹمی قوت اے، قیامت تئیں دشمن پاکستان ولوں میلی اکھ نال نی ݙیکھ سڳدا۔ انہاں آکھیا جو پاکستان توں دہشت گردی دے خاتمے کیتے ستر ہزار جاناں نچھاور کیتی ڳئن۔ زندگی توں ہر شعبے توں تعلق رکھݨ آلے لوکاں ایندے اچ آپݨا حصہ پاتے۔ افواج پاکستان، پولیس سودھے چاریں صوبیاں دے لوکاں قربانیاں ݙتن تاں ونڄ تے ایں ناسور کوں دفن کیتا ڳئے۔ وزیراعظم آکھیا جو بدقسمتی نال گزریل کڄھ سالیں دی غلطیاں پاروں دہشت گردی ولا سر چاتے۔  دہشت گردی توں پاکستان دی معیشت کوں ڈیݙھ سو ارب ڈالر دا نقصان کیتے جڈانجو ایندے مقابلے اچ اساکوں 20 ارب ڈالر ݙتے ڳئن۔ پاکستان دی دہشت گردی دے خلاف جنگ دا فیدہ پوری دنیا کوں تھیے۔ ہمسایہ ملک توں تھیوݨ آلی دہشت گردی دا خاتمہ تھیے ایندے کیتے پاکستانی قوم وݙی قربانیاں ݙتن۔ دفاعی اداریاں ایں بارے پورا کردار ادا کیتے۔ قوم اینکوں ہمیشہ یاد رکھیسی۔ وزیراعظم آکھیا جو پاکستان ہک زمانے اچ تیزی نال ترقی دی راہ تے ہئی۔ پی آئی اے دے ماہرین کئی برادرملکاں دی ایئرلائنز ٻݨا تے ݙتی پر بدقسمتی نال اساکوں اڄ ایں ادارے دی نجکاری کرݨی پئی اے۔ پاکستان دے پںج سالہ ترقیاتی منصوبے دی کاپی کیتی ڳئی اتے جنوبی کوریا پاکستان دے راہ تے ٹوریے اتے اڄ بدقسمتی نال جنوبی کوریا اتے پاکستان دی ترقی دا موازنہ کرن تاں او اساں توں اڳوں نکل ڳئے۔ وزیراعظم آکھیا جو اساں نینگراں کوں سارے وسائل ݙیوݨے ہن تانجو معیشت بہتر تھی سڳے۔ بطور وزیراعلیٰ نینگر نسل کوں لکھاں لیپ ٹاپس میرٹ تے ݙتے۔  پنجاب ایجوکیشن انڈومنٹ فنڈ توں 22 ارب روپے دے وظائف طالب علماں کوں ݙتے۔ اے ہونہار نینگر اڄ آپݨے شعبیاں اچ نشابر خدمات سرانجام ݙیندے پئن۔ پنجاب انڈومنٹ فنڈ اب پاکستان ایجوکیشن انڈومنٹ فنڈ ٻݨ ڳئے۔ وزیراعظم آکھیا جو اساں نینگر نسل دی تعمیر کریسوں۔ سمال میڈیم انٹرپرائزز اچ نینگراں کوں اڳوں ڳھن تے ویسوں۔ سٹیٹ بینک نال ایں بارے ڳالھ مہاڑ تھئی اے۔ او نینگراں کوں 40 فیصد قرضے ݙیسن۔ انہاں آکھیا جو مشرقی پاکستان اچ پاکستان مخالف تحریک چلاوݨ آلے اتے نظریہ پاکستان کوں دفن کرݨ دی ڳالھ کرݨ دے مجسمے تئیں ٻھن ݙتے ڳئے۔ ایں توں سبق ڳھنݨ دی لوڑھ اے۔ انہاں آکھیا جو اساں اوکھ سہسوں اتے انہاں دا حل کݙھیسوں۔ انہاں آکھیا جو بجلی عام بندے کیتے ہک وݙا چیلنج اے۔ اساں ترقیاتی بجٹ توں 50 ارب روپے کݙھ تے 86 فیصد گھریلو صارفین کوں ریلیف ݙتے۔ پنجاب حکومت آپݨے وسائل توں 45 ارب روپے دی سبسڈی دا اعلان کیتے ایں نال گھریلو صارفین کوں وݙا ریلیف ملسی۔ ایں تے کوئی سیاست نی تھیوݨی چاہیدی بلکہ بئے صوبے وی ایندے اچ حصہ پاون۔ اڄ پاکستان کوں تقسیم نی بلکہ اتفاق اتے اتحاد دی لوڑھ اے۔ اساں نیک نیتی نال پاکستان دی حالت بدلݨ دا عزم کر ڳھنن تاں پاکستان اقوام عالم اچ عزت اتے وقار دے نال سر چا تے ٹر سڳدے۔ اڄ دے معروضی حالات دا تقاضا اے جو سیاستدان رَل تے ایں ملک دی خدمت کرن اتے آئینی اداریاں دے نال انہاں دے دائرہ کار اچ رہندیں ہوئیں رل تے کم کریسن تاں تاریخ ہمیشہ یاد رکھیسی نتاں آوݨ آلی نسلاں معاف نہ کریسن۔ اساں مسلح افواج پاکستان دے سپہ سالار نال رل تے پاکستان دی ترقی کیتے کم کریندے پئیوں۔