وزیراعظم شہباز شریف دی صدارت اچ اجلاس ،  الیکٹرک گاݙیاں سانڳے خصوصی 44 فیصد گھٹ رعایتی ٹیرف تاریخ ساز پیکیج  قرار

اسلام آباد۔15جنوری(اے پی پی) وزیراعظم محمد شہباز شریف پاور ڈویژن دی طرفوں الیکٹرک گاݙیاں سانڳے خصوصی 44 فیصد گھٹ رعایتی ٹیرف کوں ھک تاریخ ساز پیکیج قرار ݙیندے آکھیے جو بجلی نال چلݨ آلیاں گاݙیاں توں پٹرول تے ڈیزل دی درآمد دی مد اچ زر مبادلہ دی بچت تھیسی تے ماحول دوست سفری سہولتاں ملسن ۔ اے ڳالھ انہاں الیکٹرک وہیکلز دے ودھارے دے حوالے نال منعقدہ اجلاس دی صدارت اچ آکھی ۔ وزیراعظم آفس دے میڈیا ونگ توں جاری بیان موجب وزیراعظم پاور ڈویژن دی طرفوں الیکٹرک وہیکلز دی پالیسی کوں خوش آئند قرارݙیندے آکھیے پاور ڈویژن دی طرفوں الیکٹرک گاݙیاں سانڳے خصوصی 44 فیصد گھٹ رعایتی ٹیرف ھک تاریخ ساز پیکیج اے۔ وزیراعظم الیکٹرک گاݙیاں دے ودھارے دی نویں پالیسی دے حوالے نال وفاقی وزیر پاور تے انہاں دی ٹیم دی تعریف کریندے آکھیے بجلی نال چلݨ آلیاں گاݙیاں توں پٹرول تے ڈیزل دی درآمد دی مد اچ زر مبادلہ دی بچت تھیسی تےماحول دوست سفری سہولتاں ملسن ، وزیراعظم الیکٹرک گاݙیاں دے حوالے نال نویں حکومتی پالیسی دی بھر پورتشہیر کرݨ تے آگاہی مہم دی ہدایت کیتی۔ اجلاس اچ الیکٹرک وہیکلز سانڳے نویں حکومتی پالیسی تے بریفنگ ݙیندے وزیراعظم کوں ݙسایا ڳئے جو الیکٹرک گاݙیاں دے چارجنگ سٹیشنز کوں  موجودہ 71روپے دی  بجائے ہݨ 39.70روپے فی یونٹ  بجلی ملسی، ایں کمی پاروں ہݨ پٹرول تے ݙوجھے ایندھن دے مقابلے اچ سفری خرچے ترائے گنا تئیں بچت ممکن تھی سڳسی ، ملک اچ پٹرول تے ݙوجھے ایندھن تے انحصار گھٹ تھیوݨ پاروں باری زرمبادلہ دی وی بچت تھیسی، ایں توں مضر صحت گیسز خارج تھیوݨ کوں روکݨ تے فضائی آلودگی نال نبݨݨ اچ وی مدد ملسی ۔ بریفنگ اچ ݙسایا ڳئے جو رعایتی بجلی نرخ تے الیکٹرک گاݙیاں دے چارجنگ سٹیشنز متعلق ریگولیشنز دے اجراء توں نویں منافع بخش کاروبار تےسرمایہ کاری دے موقع ملسن جیں توں نہ صرف ملازمت دے نویں موقع ملسن بلکہ پوری ملکی معیشت کوں وی طاقت ملسی ایں توں انڄ الیکٹرک گاݙیاں دے چارجنگ سٹیشنز متعلق ضوابط دے نفاذ توں 15ݙینھاں اچ رجسٹریشن تے کاروبار دی اجازت ملسی ۔ بریفنگ اچ ݙسایا ڳئے جو ملکی تاریخ دے پہلے الیکٹرک گاݙیاں دے چارجنگ سٹیشنز دے قیام اتے بیٹریاں دے متبادل پوائنٹ متعلق قواعد و ضوابط وی بݨائے ڳئن ۔ وزیراعظم کوں ݙسایا ڳئےجو مسابقتی مارکیٹ یقینی بݨاوݨ تے ملکی تے غیر ملکی براہ راست سرمایہ کاری ممکن بݨاوݨ سانڳے ریگولیشنز کوں ٻہوں سوکھا بݨایا ڳئے ، انہاں قواعد و ضوابط دے تحت نیشنل انرجی ایفی شنسی اینڈ کنزرویشن اتھارٹی ( این ای ای سی اے )چارجنگ سٹیشنز تے حفاظتی  اقدامات کوں یقینی بݨیسی ہر چارجنگ سٹیشن دی سالانہ انسپکشن تھیسی ۔اجلاس اچ وفاقی وزیر اقتصادی امور احد خان چیمہ، وفاقی وزیر صنعت و پیداوار رانا تنویر حسین ، وفاقی وزیر اطلاعات و نشریات عطاء اللہ تارڑ ، وفاقی وزیر پاور سردار اویس احمد لغاری ، وزیراعظم دی کوآرڈینیٹر موسمیاتی تبدیلی رومینہ خورشید عالم اتے متعلقہ اعلیٰ سرکاری افسران شرکت کیتی