صنعتی اتے گھریلوصارفین سانڳے بجلی دیاں قیمتاں گھٹ کیتیاں ڳئن،وفاقی وزیراویس لغاری

اسلام آباد۔15جنوری(اے پی پی) وفاقی وزیرتوانائی سرداراویس احمد خان لغاری آکھیے ملک کوں خطے دے ملکاں اچ سستی بجلی دے حوالے نال سرفہرست بݨاوݨ سانڳے پرعزم ہیسے ، صنعتی تے گھریلوں صارفین سانڳے بجلی دیاں قیمتاں گھٹ کیتیاں ڳئن ، جاری مالی سال دے پہلے پنج مہینے اچ گردشی قرضے دی مد اچ 368ارب دے ضیان کوں روکیا ڳئے تے 12ارب دی بچت کوں یقینی بݨایا ڳئے ، عوام کوں سستی بجلی ݙیوݨ سانڳے کہیں ریگولیٹر یاڈسٹری بیوشن کمپنی کوں کھلواڑدی اجازت نہ ݙیسوں ۔ قومی اسمبلی دے اجلاس اچ سوالاں دے وقفے ویلھے ایوان کوں بجلی دے نظام تے تفصیلی بریفنگ ݙتی تے ارکان دے سوالاں دے جواب ݙتے۔ آغارفیع اللہ دے سوال تےوفاقی وزیرآکھیے اتحادی حکومت اچ شامل جماعتاں پاورڈویژن کوں حمایت ݙتی جیں تے ٻہوں کامیابیاں ملئن ، انھاں کامیابیاں پاروں اپوزیشن کوں ایوان اچ ٻہݨ دی ہمت نی تھیندی ۔ جون 2024 دے مقابلے اچ بجلی دے انڈسٹریل ریٹ اچ 11روپے گھٹ تھی چکن ، عام صارفین سانڳے بجلی دے نرخ 4روپے گھٹ تھئن ، 1457ارب روپے جیڑھے آئی پی پیز کوں صارفین دی طرفوں ونجݨے ہن انھاں دے معاہدے تھی چکئن ۔ اے اوہے آئی پی پیز ہن جنہاں توں محمدعلی دی رپورٹ موجب عمران خان دی حکومت کوں نبݨݨا ہئی ، عمران خان انہاں کوں کچاری اچ گھن آوݨ دی بجائے انہاں کوں عالمی ثالثی اچ ونڄݨ ݙتا تے پاکستان کوں فیدہ چاوݨ نی ݙتا ڳیا ، حکومت 28کمپنیاں نال معاہدے کیتن ، مارچ 2025دے بعد حکومت پاکستان کوئی بجلی مل نہ گھنسی ، این ٹی ڈی سی دی ری سٹرکچرنگ تھی چکی اے ، ای وی دی چارجنگ سٹیشن سانڳے نرخ 71روپے توں گھٹ کرتے 39روپے کرݙتی ڳئی اے ایں توں ماحولیات کوں فیدہ تھیسی ۔ اپریل تئیں پاکستان خطے اچ سستی بجلی ݙیوݨ آلے ملکاں اچ سرفہرست ہوسی،گزریل مالی  سال دے پنج مہینے اچ گردشی قرضے اچ 368ارب روپے دا ودھارا تھیا ہئی جاری مالی سال دے پہلے پنج مہینے اچ 368ارب دے ضیان کوں روکیا ڳئے تے 12ارب دی بچت یقینی بݨائی ڳئی اے ، ڈسٹری بیوشن کمپنیاں 170ارب دا ضیان کیتے جیڑھا جو گزریل مالی سال دے مقابلے اچ 53ارب روپے گھٹ اے ،اڳلے مہینے اچ وھیلنگ دے خواب کوں توڑ پڄایا ویسی ۔خصوصی اقتصادی زونز کوں بجلی ݙیوݨ اچ ایکسئین دے کردارکوں محدود کرݙتا ڳئے ، پاکستان دی تاریخ اچ پہلی واری کے الیکٹرک ھک ریگولیٹرکو7ںسال دے بجلی دے ٹیرف سانڳے اپلائی کیتے، جے ایندی اجازت ݙتی ونڄے تاں صارفین کوں اڳلے ست سالاں اچ 550ارب روپے دا ضیان تھیسی اساں ایندا نوٹس ڳھدے ، اساں ریگولیٹرکوں ݙسائے ، ملک اچ جتھاں جتھاں بجلی فاضل اے تاں ایندی نیلامی دے پاسے ویندے پیوں سارے سرپلس بجلی سانڳے ھک شفاف نظام بݨایا ویندا پئے ۔ اے ساری او اصلاحات ہن جنہاں تے پہلے توں عملدرآمد تھیندا پئے ، ڈسٹری بیوشن کمپنیاں دی نجکاری سانڳے 31جنوری تئیں شرطاں پوریاں تھی ویسن ، نیٹ میٹرنگ دے حوالے نال وی اقدامات داسلسلہ جاری اے، اڄ صرف امیرآدمی کنے نیٹ میٹرہن ، مڈل اتے لوئرمڈل کلاس دے لوکاں کنے نیٹ میٹرکائنی اساں ایجھا نظام ڳھدی آندوں جیں توں انصاف تےمبنی طریقہ کارلاگوہوسی،ایں نظام دے طریقہ کارکوںشفاف بݨایا ویسی ۔عثمان بادینی دے سوال تے وفاقی وزیرآکھیے  ہرفیڈرتےلاسز دے مقابلے اچ بجلی ݙتی ویندی اے ۔ سیدحفیظ الدین دے سوال تے انہاں آکھیے ریگولیٹردا طریقہ کارآئین دے تحت نافذ ہن، اساں آئینی طریقہ کارموجب ریگولیٹرزنال ڳالھ مہاڑ کریندوں  عوام کوں سستی بجلی ݙیوݨ سانڳے کہیں ریگولیٹر یاڈسٹری بیوشن کمپنی کوں کھلواڑدی اجازت نہ ݙیسوں