توانائی دے شعبے اچ اصلاحات دا عمل جاری اے، جولائی توں نومبردے دوران  گزریل سال دے مقابلے اچ گردشی قرضہ اچ 12 ارب روپے دی گھٹکی تھئی،  وفاقی وزیرتوانائی اویس لغاری

اسلام آباد۔15جنوری(اے پی پی) وفاقی وزیرتوانائی  (پاور ڈویژن ) سردار اویس احمد خان لغاری آکھیے توانائی دے شعبے اچ اصلاحات داعمل جاری اے،گزریل سال دے مقابلے اچ جولائی توں نومبردے دوران گردشی قرضہ گھٹ تھئے ۔ پریس کانفرنس توں خطاب کریندے انہاں آکھیے اساں جولائی توں نومبر گردشی قرض اچ 12 ارب روپے دی کمی کیتی،اڄوکے سال پنج مہینے اچ ڈسکوز دا ضیان 170 ارب توں ودھݨ نی ݙتا ڳیا ،جے ݙو ٻیاں کمپنیاں دے بورڈ بدلدے تاں اے ضیان 140 ارب ہوندا ۔وفاقی وزیر آکھیے بجلی دی تقسیم کارکمپنیاں دے ضیان اچ وی گھٹکی تھئی اے ،ڈسکوزکوں سیاسی مداخلت توں پاک کریندے گڈگورننس کوں چنڳاں بݨایا ڳئے ۔اویس لغاری آکھیے سارے صنعتی اتے اقتصادی زونزمتعلق طریقہ کار بدال ݙتے ،معاشی سرگرمیاں تکھیاں کرݨ سانڳے کاروباری برادری کوں سہولتاں ݙیوݨیاں ہن ۔ انہاں آکھیے ہݨ سب انڈسٹریل اسٹیٹس کوں ون ونڈو دے تحت بلنگ ملسی ۔ اویس لغاری آکھیے وزیراعظم دی صدارت اچ اجلاس اچ پٹرول اتے ڈیزل دے استعمال توں ضیان دا جائزہ ڳھدا ئے ۔ انہاں آکھیے الیکٹرک وہیکلزکوں ودھارا ݙیوݨ سانڳے اقدامات اقدامات جاری ہن،چارجنگ اسٹیشناں سانڳے ٹیرف اچ 45 فیصد کمی دا فیصلہ کیتا ڳئے ،چارجنگ اسٹیشنز کوں سستی بجلی نال الیکٹرک گاݙیاں دا رحجان تکھا تھیسی تے چارجنگ اسٹیشنز دے قیام سانڳے طریقہ کار وی سوکھا بݨیندے پیوں ۔ڳلی محلے اچ موٹرسائیکل اتے رکشے چارج کرݨ سانڳے الیکٹرک اسٹیشن موجود کائنی ،چارجنگ اسٹیشن دا ٹیرف 39 روپے 70 پیسے کرݙتا ڳئے ، بجلی دی  قیمت گھٹ کرݨ نال ڳلی محلے اچ چارجنگ اسٹیشنز کھل سڳسن ۔وفاقی وزیر توانائی آکھیے چارجنگ اسٹیشن بݨاوݨ سانڳے این اوسی 15 ݙینھ اچ جاری تھیسی ،متبادل توانائی دے شعبے اچ سرمایہ کاراں کوں سہولتاں ݙیندے پیوں ۔ اویس لغاری آکھیے ایس آئی ایف سی سرمایہ کاری اچ اہم کردا نبھائے ،ای وی ٹیرف اتے ایں حوالے نال قواعدوضوابط دااعلان کرݙتا ڳئے ۔وفاقی وزیر آکھیے امید اے گرینز کلائمٹ فنانس دا وعدہ کرݨ آلی دنیا دا وعدہ پورا کریسی ،ای بائیکس تے فنانسنگ کیتی ونڄے تاں جو ماحول دوست موٹرسائیکل چلن،پوری دنیا کوں گرین فنانسنگ کرݨی چاہیدی اے ۔انہاں آکھیے بجلی دی قیمتاں گھٹ کرݨ دا سفر جاری اے ،آندے کجھ مہینے اچ پاکستان خطے اچ گھٹ قیمت تے بجلی مہیا ݙیوݨ آلا ملک بݨ ویسی ۔ اویس لغاری آکھیے پاکستان اضافی بجلی دی دلدل اچ پتھا ہویا اے جیویں جیویں بجلی دیاں قیمتاں گھٹسن ایں صورت حال نال نبݨیا ونڄ سڳسی ۔وفاقی وزیر آکھیے کیپٹیو پلانٹس معاملے تے آئی ایم ایف نال ڳالھ مہاڑ جاری رہسی اساں چاہندوں انڈسٹری تے کوئی ٻوجھ نہ آوے ۔ آئی پی پیز نال نویں معاہدے کرݨ نال مجموعی طور تے 14 سو ارب دا فرق پوسی ، اساں چھیکڑ ٹئیں صارفین دے حقوق سانڳے لڑدے رہسوں ۔اویس لغاری آکھیے این ٹی ڈی سی اچ جتنیاں خامیاں ہن او ختم کیتیاں ویندیاں پئن ، بجلی چوری دے خلاف مہم تاحال جاری اے، ساݙی بجلی چوری دی ریکوریزچنڳی تے چوری گھٹ تھئی اے۔